ORANJESTAD (AAN)— Vicepresidente di e Federacion di Trahadornan di Aruba (FTA) mr. Jose Figaroa, a bisa den conferencia di prensa tocante e Congreso Statutario,
cu durante esaki nan lo menciona kico ta e intencion tras di e cambionan den e ley laboral cu gobierno a implementa, entrante 1 di September.
En todo caso, Jose Figaroa a bisa, durante e Congreso lo trece sesionnan informativo pa FTA su delegadonan y membresia en general, tocante e cambionan, cu por cierto no a wordo formula aworaki, sino for di aña 2016, tempo cu FTA tabata tin participacion tambe, den e Comision cu a discuti e cambionan aki.
Figaroa a splica cu no ta cambionan hopi grandi, dus no ta un Ley Laboral nobo a wordo introduci, pero algun cambio cu a wordo haci riba e leynan existente.
E Ley Laboral mes a wordo cambia na aña 2013 y despues a bin algun cambio cu a ser discuti na 2016, pero cu a wordo implementa aworaki, for di entrante 1 di September en curso.
Vicepresidente di FTA a sigui bisa cu banda di trece e oradornan internacional, tambe ta interesante haya un cooperacion sindical cu Hulanda, y di hecho, e Presidente di e Federacion, sr. Dirksz, tabata na Hulanda e siman cu a pasa, unda a papia cu un lider sindical, y e idea no ta solamente pa trece cooperacion cu Hulanda, sino tambe regionalmente.
Den e Congreso tin como invitado, tanto sindicatonan for di Bonaire como di Curacao, y e intencion ta pa intercambia idea y sigur riba “con bo ta profila bo mes como sindicato y con bo ta duna mas forza pa e voz di e sindicatonan na Aruba, tanto localmente como regional y internacionalmente, tambe. Asina Vicepresidente di FTA a señala.
Figaroa a extende un invitacion pa tur delegado y miembro di FTA, pasobra tanto e Conferencia como e Congreso ta di sumo importancia pa e Sindicato, y e ta un momento oportuno pa como delegado trece nan preocupacionnan dilanti, no solamente di nan mes pero di nan coleganan na trabao ya cu nan como delegado ta representa e miembronan y nan empresa, pues ta importante pa nan trece e voz di e miembronan di FTA hunto, atrobe.
FTA tin mas di tres mil miembro y ta dificil pa trece nan tur hunto den un solo lugar, pero pesey, nan tin e structura di delegado, cu na nan turno ta bin pa trece e preocupacionnan di nan coleganan na pia di trabao.
“Pues, ta sumamente importante pa participa na e Congreso aki, y pesey nos invitacion sigur ta, pa nan tey presente y banda di e hecho cu e ultimo punto di agenda, ta bay ta e eleccion di e directiva nobo di FTA, cu ta bay hiba FTA e siguiente tres añanan”, mr. Jose Figaroa a subraya.
