Minister Dangui Oduber: --- *Kiermen cu tabata turistanan di calidad hopi halto
ORANJESTAD (AAN) – Minister di Salud Publico y Turismo, den conferencia di prensa na cuminzamento di siman, a elabora tocante e resultadonan di recuperacion di nos industria turistico, pa loke ta regarda Luna di Februari.
E dignatario a comparti cu pueblo di Aruba e resultadonan pa Luna di Februari, cu el a caba di ricibi. Minister Oduber a reitera cu ora Januari 2022 a habri, gobierno a haci su proyeccionnan teniendo cuenta cu nan a spera cu lo tin un aña 2022 hopi miho cu aña 2021, y e datonan preliminar tabata indica cu Aruba lo a recupera mas cu 100%.
Den comparacion cu aña 2019 cu tabata un di e miho añanan den historia di Aruba, y pesey semper nan ta uza 2019 como base di referencia, pa loke ta recuperacion turistico.
No obstante, Aruba a haya su mes confronta cu e variante omicron cu tabata tin su consecuencianan pa luna di Januari, cu semper ta considera un bon luna pa turismo normalmente, pasobra e ta temporada halto.
Esaki, logicamente, a cambia e proyeccionnan pa aña 2022, y mester a reahusta esakinan. Sinembargo, e industria di turismo ta recuperando bek, despues cu a sobrepasa omicron, e dignatario a enfatiza.
Den Luna di Januari ya caba gobierno a anuncia su estrategia di salida, y a dicidi pa enfoca 100% riba recuperacion di Aruba su turismo y su economia.
“Nos ta mira cu Luna di Februari tabata un hopi miho luna, e siman cu a pasa nos a ricibi casi 10 mil turista y esaki ta un señal hopi cla, cu nos ta yegando bek na e nivelnan di 2019. Haya diez mil turista den un fin di siman, tabata e cifranan cu nos tabata tin prome cu e pandemia a cuminza”, Minister Dangui Oduber a subraya.
E dignatario a agrega cu pa loke ta e recuperacion mes di turismo, por mira cu den Luna di Februari Aruba a ricibi 77.961 turista, y esaki ta un recuperacion di 84%, compara cu Februari 2019. E mandatario a agrega cu esaki compara na Januari, unda Aruba a ricibi 60 mil turista, tabata tin un crecemento di 8.168 bishitante, cu ta un crecemento di 30%.
E mandatario ta considera importante pa menciona cu den luna di Januari, apesar cu no tabata tin e recuperacion cu gobierno a spera, encuanto cantidad di turista, toch e cantidad di placa cu e turistanan a laga atras, tabata tin un recuperacion di 79%. Esaki ta indica cu e turistanan cu a bin den Luna di Januari, tabata di un calidad haltisimo, pasobra nan a gasta hopi placa y laga atras den Aruba su economia.
