Aruba mester haya contesta pakico Eagle LNG a bira problema - *Cuanto un pober mester paga pa laba su man y evita Covid-19? - *Den Parlamento tur contracto relaciona cu WEB mester bini dilanti
ORANJESTAD (AAN) — Loke por a spera a socede. E siman nobo ta habri Aruba den un crisis severo debi na otro ola di Covid-19 cu sin duda lo ta un menasa directo pa cada ciudadano y Aruba den su totalidad.
Loke ta mas tristo den henter e situacion aki ta, cu uno di e formanan mas importante pa hende defende su mes contra e malesa cu a mata Miyones, ta limpiesa.
Den e situacion aki ta topa cu discusionnan relaciona cu e situacion cu a surgi na WEB, cu ora analisa accionnan gubernamental mester bolbe te na inicio di decada 2010-2020 ora ta topa cantidad di discusion, mencion di cantidad di compania y falta di mencion di cantidad di compania cu mester a wordo presenta na 2017.
Kico awa ta nifica pa hende?
Kico awa ta nifica pa un pober sigur den un pandemia y den un crisis mundial? Kico awa ta nifica pa un famia?
Ora analisa tur loke a pasa na Aruba for di momento cu a wordo anuncia cu Eagle LNG por haci posibel pa awa bira mas barata pa Aruba, preguntanan serio ta bini dilanti.
Preguntanan cu DIARIO a haci su mes, for di momento cu DIARIO mester a rectifica un articulo pasobra DIARIO a comete e eror grandi di skirbi cu WEB ta na mesa cu Eagle LNG pa asina negocia un prijs mas barata di awa pa Aruba.
Pakico DIARIO a yega na e conclusion aki?
Pasobra Gobierno di Aruba, cu a base di eleccion liber a wordo forma, a yega na un acuerdo basico cu Eagle LNG pa bini cu un proyecto pa distribui gas den region di Caribe.
Un proyecto cu lo a crea trabou, lo a nifica entrada pa pais Aruba pero tambe lo a haci posibel pa prijs di awa local baha ya cu ta bay haya gas na un prijs preferencial.
DIARIO a tuma nota con WEB tambe a wordo introduci na Eagle LNG y con miembronan di gerencia di WEB tabata den e reunion caminda Eagle LNG a presenta su mes y su plannan.
DIARIO a investiga na Merca kende Eagle LNG y DIARIO, conocedor di e forma cu leynan Mericano ta mara un compania Mericano na haci negoshi, a informa Aruba di Eagle LNG, di e interes enorme den region di Caribe pa Eagle LNG pero tambe pa gas den produccion di awa, sigur na 2020.
Pa gran sorpresa di DIARIO, e entusiasmo di DIARIO a topa cu arogencia di gerencia di WEB, cu a pidi rectificacion mientras por a manda simplemente un peticion of un texto pa contradeci e hecho cu WEB ta negocia un prijs preferencial pa awa cu Eagle LNG.
Pero aparentemente ta pica mortal DIARIO a comete pa pensa cu e loke tabata gerencia di WEB, lo a sinta na mesa cu Eagle pa asina por baha prijs di awa pa Pueblo di Aruba, cu na 2020 mester a cuminsa biba cu e realidad di necesidad di awa den proteccion di su bida.
“Laba man” tabata parti di e forma pa Pueblo di Aruba defende su mes contra Covid-19, e enemigo mortal di hende.
Cuanto un Arubiano mester paga pa laba su man na Aruba? Esaki ta preocupacion di DIARIO, cu hamas por a comprende ni comprende pakico tabata asina dificil pa un gerencia di WEB sinta na mesa negocia cu Eagle LNG.
Awe por tuma nota cu miembronan di Parlamento kier discuti e desaroyonan na WEB den Parlamento. DIARIO lo sigui bisa cual ta e informacionnan cu DIARIO sigur kier ricibi y cu ta relaciona cu negociacionnan cu a tuma luga cu Gasunie, cu cual gobierno anterior di Mike Eman tabata tin contacto pero cu na 2017 e gerencia di WEB cu awe a bay cas a presenta na mes gobierno di AVP pa medio di Mike de Meza pa yega na un union pa atende cu gas pa WEB.
Ta e union aki di WEB, Gasunie y Utilities e tempo bou mando di Hoevertsz kier a trece candidatonan for di 2017 y awe DIARIO mester di informacion riba e candidatonan aki pa e presenta na Aruba.
DIARIO lo sigui tur desaroyo riba e asunto di awa pasobra ta increibel cu introduccion di un compania di reputacion internacional pa trece gas pa baha prijs di awa, no a wordo gara cu dos man pa alivia prijs di awa pa Aruba, cu den un pandemia mester laba su mes man cu awa cu den e crisis mundial cu a kita pan for di boca di trahadonan simpel cu no ta miembro di gerente di un compania, a keda un likido tan costoso!
