Ainda tin luga habri pa CTRL + ALT + LEAD CAMP organisa pa Parlamento Hubenil

Jeugd consulent di Parlamento Hubenil Milviene Dijkhoff:

ORANJESTAD (AAN): Vakantie di scol ya a cuminsa pa hopi mucha y hoben na Aruba. Mayornan ta activamente buscando actividadnan cu no solamente ta entretene, sino cu tambe ta contribui na e desaroyo personal di nan yiunan. Den e contexto aki, jeugd consulent di Parlamento Hubenil Milviene Dijkhoff, ta anuncia cu inscripcion pa CTRL + ALT + LEAD CAMP ta sigui habri, pero cu e cantidad di participantenan ta limita.

E camp, cu ta wordo organisa pa hobennan entre 12 y 18 aña, ta limita na un maximo di 50 participante. Segun señora Dijkhoff, ya caba a drenta varios inscripcion pero ainda tin un cantidad limita di luga disponibel ainda. P'esey, e organisacion ta haci un yamada na mayornan y hobennan pa registra mas pronto posibel. Inscripcion ta cera ora yega na 50 particpante.

"Nos meta ta pa brinda hobennan un experiencia cu ta inspira nan pa bira lider, traha hunto cu otro y descubri nan potencial. Pa mantene calidad di e experiencia y sigura atencion personal na cada participante, e cantidad di luga ta limita," señora Dijkhoff a expresa.

Durante cuatro siman, participantenan lo forma parti di un programa dinamico yen di tayernan, actividadnan practico, reto di ekipo y experiencianan educativo, dirigi na fortalece habilidadnan cu lo beneficia nan tanto na scol como den nan bida diario.

E temanan principal cu lo trata durante 4 siman di actividad ta entre otro: Leadership & Team Building, Medio Ambiente & Sostenibilidad, Participacion Activo & Derecho di Mucha, Inclusion & Diversidad.

Entre e actividadnan lo tin scavenger hunt, charla y workshop riba tema di SDG’s, recycling, excurcion educativo, y quiz.

Señora Dijkhoff a enfatisa cu mas cu un vakantie-camp tradicional, CTRL + ALT + LEAD CAMP ta enfoca pa prepara un generacion di hobennan cu ta pensa criticamente, ta colabora, ta tuma iniciativa y ta reconoce e balor di participacion activo den comunidad.

E programa lo tuma luga durante e siguiente fechanan:

Siman 1: 20, 22 y 24 di Juli

Siman 2: 27, 29 y 31 di Juli

Siman 3: 3, 5 y 7 di Augustus

Siman 4: 10, 12 y 14 di Augustus 

Actividadnan lo wordo teni entre 8:30 a.m. te 3:00 p.m., y participacion ta completamente gratis.

Parlamento Hubenil Aruba ta invita tur hoben cu tin interes den liderazgo, crecimiento personal, servicio comunitario y haci amistadnan nobo pa registra. Inscripcion por wordo haci via e formulario oficial: https://forms.gle/mBhK9NbSmuz9ZS458 cu por obtene riba paginanan social di Parlamento Hubenil Aruba.