Minister Gerlien Croes:
ORANJESTAD (AAN): Ministerio di Relacionnan den Reino, Educacion, Hubentud, Innovacion y Deporte ta informa tocante e continuacion di e maneho pa reduci e tamaño di klas den enseñansa preparatorio (kleuter), basico y secundario (voortgezet) pa e aña escolar 2026-2027. E maneho aki, cu a keda introduci oficialmente desde e aña escolar anterior (2025-2026), tin como obhetivo principal pa garantisa un educacion di calidad halto y percura pa e bienestar integral di tanto e alumnonan como e docentenan. Den transcurso di e ultimo añanan, a nota un aumento continuo den e presion laboral riba e maestronan di scol, locual por pone e atencion individual cu cada alumno merece den peliger. Pa combati e desafio aki di forma directo, Ministerio ta keda pone enfasis riba su esfuerso pa stimula y mantene gruponan mas chikito y balansa.
Norma pa aña escolar 2026-2027
Cu continuacion di e norma aki ta premira pa logra e siguiente beneficionan clave.
Mas atencion individual: E maestronan lo conta cu mas espacio y tempo pa responde na e necesidadnan specifico y e ritmo di desaroyo di cada alumno. Tambe cu e implementacion aki kier hisa e satisfaccion laboral: Un reduccion directo den e carga di trabou di nos personal educativo, locual por contribui grandemente na nan motivacion y salud ocupacional. Por ultimo, e maneho aki lo por trece miho rendimento academico: Grupo mas chikito, specialmente den e añanan crucial di formacion y desaroyo inicial, tin un impacto positivo riba e resultadonan di siñamento.
Mantencion di e grandura di klas, segun ley
Di otro banda, Ministerio ta mantene e grandura minimo manera stipula den ley. Un klas mester consisti di un minimo di 16 alumno. E condicion aki ta keda primordial pa por garantisa e eficiencia den e maneho di recurso y pa fomenta un dinamica social sano, constructivo y participativo entre e alumnonan den e grupo.
Implementacion, Cooperacion y Trabou na Midi
Consciente di e desafionan logistico y organisatorio cu e stipulacionnan aki por trece cune pa e planificacion y formacion di personal, Minister ta extende un yamada na tur directiva di scol pa aplica e norma di 24 alumno mas exacto posibel, semper considerando e capacidad di e edificionan escolar y e personal disponibel. Den caso cu pa motibo di forsa mayor of circumstancianan excepcional un scol ta coriendo risico di sali fuera di e margen stipula (entre 16 y 24 alumno), Ministerio ta totalmente habri pa drenta den dialogo directo y busca solucion den forma coordina. Ministerio di Educacion ta reafirma su compromiso pa traha conhuntamente cu e directivanan di scol, Directie Onderwijs, y Dienst Inspectie van het Onderwijs pa asina percura pa un ambiente escolar mas saludabel y un structura di cuido educativo solido pa e futuro di Aruba.
