Kimberly de Cuba, di Telefon pa Hubentud:
ORANJESTAD (AAN) -- Den entrevista cu Kimberly de Cuba, Trahado di Telefon pa Hubentud, el a menciona cu e pelicula cortico “My Story” no tabata solamente pa e dia di su presentacion inicial, pero por a sigui mira esaki y te ainda por wak’e.
E pelicula ta ilustra e bida cu hobennan ta bibando y kico nan ta desea. Pero banda di esey, naturalmente, y tanten cu partnernan ta permiti esaki, y yuda den e parti financiero, por ehemplo, 131 lo sigui traha pa tur e gruponan, no solamente emigrante pero tambe local. Esaki pa crea e confianza y e safety unda nan por busca ayudo. “Y no ta straño cu muchanan na Aruba sa kico 131 ta, pasobra nos ta zorg pa ta den tur scolnan, cuminzando for di kleuter caba.
Anto esaki ta zorg pa nan tin un caminda cu nan por cana, na momento cu nan no ta sinti e confianza na cas, por ehemplo, of cu hendenan cu ta den nan ambiente cu nan no ta confia, cu nan por tuma contacto busca informacion, pa sa unda nan por haya ayudo”, Kimberly a comenta.
Kimberly a indica cu pa añanan caba, tur directiva di scol ta habri pa Telefon pa Hubentud bishita scol, ya cu nan mes por pasa den cierto complicacionnan, pero esey no ta kita cu nan no ta cera porta pa 131.
“Den e casi 25 aña cu nos tin trahando pa e mucha y hobennan, nos no a experiencia cu un scol a cera porta pa nos. Mi persona mes, dos aña pasa tabata bezig cu un proyecto di speelschool caba, y hopi hende ta pensa cu e mucha ta mucho chikito y no ta compronde, pero tur cos ta bay na e manera con bo ta trece dilanti anto na un manera hopi adecua, nos a indica cu for di chikito caba na crèche nan a haya informacion ken ta 131”, Kimberly de Cuba a relata.
Esaki no ta un reto pa Telefon pa Hubentud, pero por ehemplo, no tur mucha ni tur hoben ta bay scol, y 131 tin otro medionan cu toch, nan sa ken e fundacion ta.
“Hasta si nos no topa nan na scol mes, nos ta zorg pa tin otro maneranan pa yega na nan” Kimberly a reitera.
