Jessica Ras, Coordinador di SVT:
ORANJESTAD (AAN) – Den entrevista cu DIARIO, Jessica Ras, Coordinador di e Trayecto di Formacion Social (SVT), a duna di conoce cu nan ta bezig cu instruccion di muchanan muher, y e ta invita pueblo cu ta wak e trayecto aki, cu ta pa damanan entre 17 cu 24 aña, pa acerca SVT mas lihe posible.
Jessica a comenta cu e ta bayendo un tiki slow y atrobe e ta pone pueblo na haltura cu nan ta bezig cu instruccion, pasobra si nan no tin e cantidad suficiente di hoben, no por start un grupo.
“Nos tambe kier purba yuda hobennan cu mester di e trayecto aki. E no ta mara na nada, bin haci intake, bin busca informacion; si ainda bo tin duda bin haci actividadnan pa wak si bo kier drenta den e grupo, y na final bo por dicidi si esey ta pa bo of no ta pa bo”, Jessica Ras a expresa.
El a reitera cu si tin un tiki interes, bay busca informacion y no tin miedo. Manera por wak tin dos grupo di dama cu ta finalizando e trayecto. E prome grupo a caba dos aña pasa, pues damanan tambe por.
