ORANJESTAD (AAN) – Rene Bernabela, lider di Sindicato TOPA, den un entrevista cu DIARIO a declara, cu Diaranzon mainta e trahadornan di KIA,
a dicidi di organiza un reunion pafo di KIA, den cuadro di e implementacion di e reorganizacion di e Instituto Coreccional aki.
“Mi tin cu bisa cu Sindicato TOPA a asisti na e reunion aki. E motibo pakico TOPA conhuntamente cu e delegadonan a organiza e reunion aki ta pasobra, mirando e hecho cu for di basta luna, e trahadornan di KIA ta sinta ta wardando e implementacion di loke nan ta yama na Hulandes ‘e ‘plaatsing procedure’ y informacion riba schalering di e personal di KIA. E ultimo reunion cu TOPA a sinta cu Departamento di Recurso Humano (DRH) cu mester a prepara y ehecuta esaki, tabata den luna di Juli. Nos ta na e momento aki dia 15 di September y eynan bo ta wak, cu for di luna di Juli te cu e luna aki, Departamento di Recurso Humano, no a ehecuta nada, nada pa loke ta e ‘plaatsing procedure’ pa loke ta KIA”, e lider sindical a subraya.
El a agrega cu akinan por ilustra cu e posicion di minister di husticia demisionario, señor Andin Bikker ta hopi zwak, mirando e hecho cu ya caba, for di Juli te cu aworaki, no a haci nada al respecto.
Segun Bernabela e mandatario tampoco a sinti ningun pushamento pa esaki por a keda cla. “Sindicato TOPA ta lamenta, sinceramente, e manera di traha sumamente nonchalant, caminda nos tin practicamente for di Januari 2021 cu e plaatsing procedure aki mester a wordo ehecuta ainda esaki no por keda cla”, Bernabela a reitera.
Sindicato TOPA a wordo avisa diamars atardi, despues di 5’or, door di e Director di KIA, cu pa Diaranzon tabata tin planea un reunion di continuacion pa loke ta implementacion di e reorganizacion.
“Pero mi tin cu bisa cu mirando e hecho cu Sindicato TOPA tin otro compromiso programa caba riba su agenda, e ta wak cu dificilmente entre awe cu mañan lo por a asisti na un reunion organiza asina relampago door di Departamento di Recurso Humano, pasobra nos ta haya esaki mucho riba man”, e sindicalista a señala.
El a agrega cu TOPA ta na spera di wak for di DRH, pa fiha otro fecha unda cu e sindicato lo por asisti na e reunion aki pa locual ta continuacion di e reunion y trahadornan di KIA lo keda riba un “standby”. Trahadornan di KIA ta dispuesto pa duna un otro fecha, pero e no mester ta uno largo atrobe, segun e sindicalista.
