NASSAU: Diaranson siman pasa, un Huez na Bahamas a sentencia dos Venezolano na cinco aña di prison cada uno,
despues cu nan a wordo gara ta drentando Crooked Island cu 1.245 kilo di cocaina. Riba caya, e droga aki tin un balor di 25 miyon Dollar.
E dos Venezolanonan, esta Jaime Digiacomo di 64 aña y Luis Perez di 29 aña, a wordo haya condena door di Huez Samuel McKinney, despues cu e dosnan aki a admiti nan culpabilidad.
Digiacomo y Perez a admiti culpabilidad di a purba di drenta cu droga den e pais, y un otro acusacion di tin droga ilegal den nan poder cu e meta pa bende nan.
Huez a impone un boet di 100.000 Dollar Bahameño (como 179 mil Florin) cada uno, y si acaso nan no paga, nan lo tin di keda 1 aña extra den prison.
E Venezolanonan a bisa Huez, cu un funcionario halto di Polis di Bahamas a yuda nan drenta cu e droga. E Huez na su turno, a bin haya sa cu Polis di Crooked Island a haya hopi sospechoso ora banda di 11:45 pm nan a tende un avion ta aterizando na aeropuerto di e isla, riba Diahuebs 23 di December cu a pasa.
Ora cu Polisnan a yega na e pista di aterizahe, nan a mira un avion priva staciona riba e pista. Ora cu Polisnan tabata yegando cerca, nan a mira cu e porta di avion ta hancho habri y diripiente dos homber a rek careda y cuminza core na pia.
Polis a core nan tras y a gara nan, y trece nan bek pa e avion. Aki ta unda cu a bin haya 44 saco grandi color preto, y 12 bloki diki, y den dje tabatin pakinan di droga.
E Venezolanonan a admiti cu nan a bula e avion for di Venezuela pa Bahamas cu e droga abordo.
Durante e caso den Corte, tur dos homber a cuestiona cu Polis no a pone den rapport e metemento di un supuesto oficial halto di Polis. Segun Digiacomo a bisa Huez, cu e oficial halto di Polis ey a keda encarga pa transporta e cocaina den un speedboat tipo Go-Fast, for di Crooked Island rumbo pa Republica Dominicana.
Riba e potret aki por mira parti di e droga cu a ser haya abordo.
