AAA c'un edificio nobo sostenibel cu ta soluciona limitacion di capacidad y tene cuenta cu experiencia di nos bishitantenan

Parlamentario Shailiny Tromp-Lee (MEP):

ORANJESTAD (AAN):  "Diabierna 21 di juni 2024, mi a asisti na un bunita anochi caminda Aeropuerto Internacional Reina Beatrix a celebra entrega di Fase 1A di e proyecto Gateway 2030. Manera Prome Minsiter Evelyn Wever-Croes mes ta subraya esaki sigur ta un otro hoya di proyecto di su Gabinete y mi ta concorda sigur cu su persona. Ta proyecto tras di proyecto ta keda anuncia na beneficio di nos pais y hendenan (deportivo, siguridad, turistico, social y mas)" asina Parlamentario Shailiny Tromp-Lee di Fraccion di MEP a indica.

            El a sigui bisa cu na 2021 Aruba Aitport Authority (AAA) a anuncia cu e Proyecto Gateway 2030 ta bay continua despues cu pa motibo di Covid nan a para esaki na 2020. E tempo ey nan a informa cu ta trata di un inversion di 140 miyon dollar cu lo crea mas di 200 cupo di trabou directo. Esaki memey di un pandemia, caminda e momento ey Aruba tabata trahando incansablemente pa domina e virus y pa poco poco yega na un grado di normalidad bek. Sigur e tabata un tremendo noticia y awe e entrega di Fase 1A ta un logro grandi pa AAA y Aruba pasobra esaki sigur lo tin un impacto positivo pa nos industria turistico y nos hendenan cu ta biaha.

            Gateway 2030 ta un proyecto hopi importante cu ta atende cu limitacionnan di capacidad cu Aeropuerto Internacional Reina Beatrix tin y cu ta tene cuenta cu e experiencia cu nos kier brinda nos bishitantenan. Na mes momento AAA a indica cu nan lo enfoca riba e parti di sostenibilidad y awe nos tin un edificio nobo cu tin un Gold Leed certification.       Diferente decision den diseño y innovacion a keda haci pa crea un berdadero edificio sostenibel. Entre nan a minimalisa e demanda di energia mediante incorporacion di un sistema mecanico di alto eficiencia energetico, proteccion di calor solar y un dak cubri cu solar panels. Banda di esaki a haci por ehempel uzo di materialnan di construccion recicla cu ta contribui na economia circular. Tambe e diseno a percura cu por uza awa condensa di e sistema mecanico pa iriga e matanan na airport.

            Fase 1A di Gateway 2030 ta consisti entre otro di construccion di un sala de ekipahe, implementacion di un sistema nobo pa atende cu ekipahe y ampliacion di e sala di facturacion di Merca. Un sala completamente nobo di US Departures, cual lo ta completamente operativo na comienso di 2025. Un facilidad moderno, espacioso y cu pinturanan di e artista local Armando Goedgedrag.  

            Un edificio cu a keda construi 100% cu companianan local cu e meta pa apoya nos economia. 100% local kiermen cu e companianan Albo Aruba NV, Bohama Aruba NV, Arubaanse Wegenbouw Maatschappij (AWM), Croon Caribe y CHS Technical Contracting and Trading Company N.V. hunto bou di e nomber ABC Project Venture a ehecuta e gran proyecto aki. Durante di e anochi di celebracion AAA a gradici cada un di nan pa cu realisacion di e proyecto.

            Durante e anochi special aki tambe a tuma despedida di e actual CEO di Aruba Airport Authority N.V., señor Joost Meijs, cu desde 2019 ta den e funcion aki. Na Juli venidero su contracto di cinco aña ta termina. Durante e anochi aki nos Minister President, Minister Dangui Oduber y Hunta Supervision di AAA a gradici señor Meijs pa su contribucion cu pais Aruba y a dese’e hopi exito den futuro. Minister Oduber a enfatisa cu e proyecto aki lo pone cu Aruba lo tin e mihor aeropuerto den caribe. Sigur un proyecto cu tin e signatura di e gabinete Wever Croes cu a crea tambe un spinoff economico y crea hopi cupo di trabou. 

            Mi kier felicita Aeropuerto Internacional Reina Beatrix, Gabinete Wever-Croes specialmente Minister Dangui Oduber pa nan vision y determinacion y e ekipo completo di AAA cu a haci e proyecto aki posibel.

            Despues di a condena e accion di retiro di personal memey di e pandemia door di AAA, mi a aplaudi e decision di AAA na 2021 pa continua cu Gateway 2030.  E tempo ey mi a indica cu mi ta mira e decision como un manera pa AAA drecha su imagen den pueblo. Awe nos tin un tremendo edificio cu su construccion sigur a yuda aporta na recuperacion di nos economia, brindando un rosea grandi na e 5 companianan di construccion, cu na nan turno a haci uzo di subcontratista y otro negoshinan. Banda di e echo cu e proyecto aki a crea cuponan di trabou pa nos hendenan durante temponan hopi dificil,  mester enfatisa cu esaki no ta finalisacion di Gateway 2030, awor ta sigui cu Fase 1B y next fasenan, asina Tromp-Lee a finalisa bisando.