A sali na cla awor cu e Mericano cu a gana $25 miyon a bishita Aruba caba prome di bay cobra premio

El a bolbe regresa tienda pa cumpra ticket y a bolbe gana

ORANJESTAD (AAN): Manera cu DIARIO a publica caba den edicion di Diasabra, e dama kende a gana un premio di $25 miyon cu ticket di raspa di Massachusetts Lottery y a bisa cu e kier bin pasa Pasco na Aruba cu su pareha.

   Pero awor a sali na cla, cu el a bishita Aruba caba par di siman pasa prome cu el a bay cobra e ticket di raspa di 25 miyon Dollar aki.

   Segun un portal na Merca, a bin sali na cla cu su storia di cu e kier bin pasa Pasco na Aruba tin un twist cune.  E dama Desiree Fortini-Craft no a tarda pa cuminza hiba un bida rico ora el a mira cu el a gana e premio di $25 miyon.  Prome cu el a bay reclama su premio, ya caba el a tuma un viahe cu su pareha, riba un vakantie extravagante pa Aruba na final di November.

   El a cumpra e ticketnan di raspa cu costa $50 cada uno na Baker Street Market na West Roxbury.  Ora cu el a raspa e ticket ganador, el a bay sconde e ticket aki na un lugar sigur, core book pasashi pa Aruba cu su pareha Jason Perkins.

   Desiree Fortini-Craft no a bisa ningun hende cu el a gana e premio.  El a bisa amigonan, cu hunto cu su pareha e kier “goza di bida”, bisando amigonan aki cu “nan kier goza di Pasco na Aruba.”

   El a bay reclama e ticket ganador te ora cu el a regresa Boston for di Miami.  Aki el a opta pa ricibi e pago lump-sum di 16.250.000 Dollar (prome cu belasting).  Ora cu el a ricibi e premio, el a declara cu e kier “bay pasa Pasco na Aruba”, y awor a sali na cla cu el a bay Aruba caba.

   A regresa pa sigui purba su suerte cu loteria: Otro informacion nobo procedente di Boston ta indica cu e ganadora Desiree Fortini-Craft a regresa atrobe na e tienda na West Roxbury unda el a cumpra su ticket cu a pone bira miyonario... y imaginabo cu el a bolbe cumpra otro raspa, bolbe gana y engrandece su ganashi.

   E biaha aki Desiree a saca un potret tipo selfie cu e doño di tienda, y a cumpra algun mas di e ticketnan di raspa aki cu ta costa $50 pa uno.  Esaki ta e raspa di mas caro cu nan a lansa riba mercado.  E biaha aki el a raspa, y a bolbe gana premio di $500.

   “E ta hopi contento, e ta feliz.  El a cumpra algun raspa un biaha mas, y a bolbe gana,” ta loke e co-doño di Baker Street Market, esta Kathy Dakoyannis a declara na prensa.  “E ta un dama cu hopi suerte”.

   Kico ta su secreto pa exito di loteria?  Dakoyannis a bisa cu Desiree ta un cliente “hopi regular” cu semper ta cumpra ticketnan di raspa den paar.  “E ta kere den dos hunto,” Dakoyannis a bisa.

   Pa su premio grandi, Desiree Fortini-Craft a escoge pa haya e lump-sum di $16.250.000 prome cu belasting.  El a bisa cu e cu su pareha kier “goza di bida” y nan tin “planea pa bin pasa un Bon Pasco na Aruba”.  E lo usa e placa pa paga tambe prestamo di estudio pa su tres yiunan y cumpra un auto nobo.

   Desiree ta un muher di suerte.  Den pasado, na aña 2006 ya caba el a gana $1 miyon for di un ticket di raspa di Massachusetts Lottery.