A rescata cachonan descuida y desnutri

Maneho nobo di Minister Bikker pa Bureau City Inspector dunando resultado 

ORANJESTAD (AAN): A base di proposicion di Minister di Husticia, Siguridad y Integracion, mr. Andin Bikker,

Conseho di Minister na inicio di 2021 a bay di acuerdo pa incorpora Bureau City Inspector (BCI) bow di Ministerio di Husticia, caminda alabes a amplia e tareanan di BCI pa dedica atencion tambe na e problema di cachonan ambulante. Ademas hunto cu Minister-President sra. mr. Evelyn Wever-Croes recientemente a inaugura un vehiculo special, cual a wordo poni disponibel door di Cuerpo Especial Arubano, pa busca cachonan cu ta cana los riba caya y hiba nan na e shelter cu Gabinete Wever-Croes a inaugura aña pasa.

                E tarea nobo di BCI a cuminsa cana mesora y ya caba ta dunando su frutonan. E tarea nobo ta encera cooperacion di varios departamento hunto, pa loke ta trata Husticia entre otro Bureau City Inspector y Cuerpo Policial (KPA), den un esfuerso pa logra un solo meta, bienestar di cachonan riba nos isla.

Awe mainta tabata un bon ehempel, ora cu instancianan gubernamental a uni (BCI, KPA y GKMB) pa rescata algun cacho cu tabata na un cas sin suficiente cuido ni alimentacion.

                Den un estado delicado a transporta nan pa shelter pa brinda nan cuido specialisa y duna nan di come. E personal di Bureau City Inspector a sigui entrenamento special pa brinda sosten na e instancianan cu ta atende cu cachonan ambulante. Asina awo, no solamente City Inspector ta supervisa y purba mantene nos isla mas limpi door di control y sancion, pero tambe ta atacando e problema di tanto cachonan tur rond di nos isla cu hopi biaha ta sin doño of tambe den algun caso cu doñonan cu ta lubida di brinda nan e cuido apropia.

                Minister Andin Bikker ta contento cu e adelanto rapido di e Bureau City Inspector, cu el a percura den un tempo cortico pa haya mas autoridad y mas entrenamiento, den cuadro di mantencion di nos isla mas limpi, cuida nos medio ambiente y controla e asunto di cachonan ambulante miho.