A firma un 'Intentieverklaring' pa localidad nobo di KPA Playa

Minister di Husticia hopi satisfecho:

*Warda di Playa lo muda pa Paardenbaaistraat 

ORANJESTAD (AAN) – Diaranzon mainta, Gobierno a yama su di dos conferencia di prensa semanal, den cual Minister di Husticia, Rocco Tjon, a hiba palabra. Tabata presente tambe señor Arie Van Tienderen, Alto Comisario señor Ramon Arnhem y señora Martis.

            Minister Tjon a cuminza expresando cu e ta sumamente satisfecho, na momento cu e ta bay firma e 'Intentieverklaring' of acuerdo di compromiso hunto cu señor Van  Tienderen, pa loke ta e localidad nobo pa cuerpo policial, specificamente pa Distrito di Playa.

            E mandatario a splica cu nan a tene cuenta cu diferente aspecto pa e warda aki por cumpli cu tur e deseonan di KPA, pero na mesun momento gobierno a tene cuenta cu diferente aspecto di seguridad.

Comunicacion y bon cooperacion:

            E dignatario a enfoca prome cu duna mas detaye, riba e aspecto di comunicacion y bon cooperacion.

            Tjon a indica cu dia 1 di Februari tabata tin e prome reunion cu Alto Mando riba e tema aki, y consecuentemente for di su ministerio nan a reuni cu e sindicato di polis (SPA), dia 3 di Februari, y dia 9 nan a haya e programa Van Eisen, cu tur e rekisitonan cu e localidad nobo mester cumpli cune,   y mesun dia nan a haya e prome oferta di e compania en cuestion.

            “Consecuentemente, for di mi ministerio e combersacionnan a cuminza y, mi por bisa cu 14 di Februari, esta ayera, e proyecto aki a wordo aproba den Conseho di Minister y awe 15 di Februari, despues cu tur cos a inicia, nos ta firma e declaracion awe pa e trabaonan por inicia, pa di e forma ey KPA por tin nan localidad nobo, na comienzo di April”, Minister Rocco Tjon a duna di conoce.

            E dignatario a expresa cu e ta sumamente gradici na tur e cuater partnernan cu a haci esaki posible. “Obviamente e compania en cuestion, Alto Mando, Sindicato di Polis y sigur, tur e trahadornan di nos ministerio”, e mandatario a señala.

   Localidad nobo: “Pa loke ta e localidad nobo, manera ta conoci, Warda di Playa lo muda for di Wilhelminastraat pa Paardenbaaistraat, unda cu Consulado di Venezuela tabata ubica. Y nos a tene cuenta cu diferente aspecto y deseonan di KPA y Sindicato di Polis (SPA) a indica”, Minister Tjon a bisa.