Di regreso na e retonan cu a spera e Prome Gobernador di Aruba
*Gobernador Felipe Tromp: e cabez ehemplar di e famia Arubano
*E calor humano y sosten di Señora Candelaria Tromp-Gomez
ORANJESTAD (AAN) — E siman aki un informacion a bira e anuncio cu un epoca a cera pa Aruba cu despedida di e prome Primera Dama di Aruba, Señora Candelaria Tromp-Gomez, conoci como Candita of Candy pa Pueblo di Aruba.
Na momento cu na Maart 1983, Reino Hulandes a bay di acuerdo cu Status Aparte di Aruba entrante Prome di Januari 1986, uno di e tareanan importante tabata, pa dicidi kende lo ta e prome Gobernador di Aruba.
E logro di Status Aparte di Aruba tabata basa riba union di e Pueblo di Aruba cu den su mayoria tabata tin Betico Croes como lider politico.
Pa por a subi e caminda di autonomia, tabata importante cu e Representante di Reino Hulandes, den practica por a sirbi e tarea tan dificil den un Monarquia Constitucional.
E prome Gobernador di Aruba mester a percura pa e identidad di Reino refleha na e pais, cu pa medio di politica lo a eligi y nombra su gobernantenan politico.
E prome Gobernador di Aruba mester por a duna prueba na e Arubiano, cu Reino Hulandes tabata comprende y percura pa su bienestar, a base di su identidad Arubano.
Na mes momento e Gobernador mester a fungi como garantia di energia neutral den e campo politico.
Aruba a aplaudi e nombracion di señor Felipe Tromp como prome Gobernador di Aruba, cu a drenta Status Aparte cu un base completamente diferente di loke el a spera tanto na nivel politico, economico, financiero y social.
E famia Arubano tabata den necesidad di un tata, di un mama, di rumannan cu tabata tene su man, comprende su dolor y yuda den e retonan grandi cu salida di Lago, violencia politico, salida di e inventor y dirigente di Status Aparte, a nifica pa Aruba.
Señor Felipe Tromp a bira un tata pa Pueblo di Aruba y e prome Primera Dama di Aruba, señora Candelaria Tromp-Gomez, a bira mama di tur e Arubianonan cu tabata tin confiansa den “Felipito y Candita”, baluarte di respet, di moral y Arubianismo.
Diadomingo mainta, prome cu kloknan di misa San Francisco cuminsa bati, Gobernador di Aruba y Señora, hunto cu miembronan di nan famia, tabata uni cu feligresnan. E prome Gobernador di Aruba, tabata presta servicio riba altar den su sirbishi na Dios.
Fe, confiansa y speransa pa futuro tabata wordo entrega na e Arubiano dor di Gobernador Su Excelencia Felipe Tromp y su señora, e Primera Dama di Aruba, Candelario Tromp-Gomez.
E Representante di Reino na Aruba y señora Candelaria Tromp, tabata gosa di un respet inmenso di e Arubiano, cu tabata tin aceso como hende, como Arubiano, na e Gobernador di Aruba y su famia.
Ta e balansa di calor humano combina cu respet automatico di e Arubiano, a comberti Gobernador Felipe Tromp, den un tata di e famia Arubano y señora Candelaria Tromp-Gomez den un mama di e famia Arubano.
E siman aki a conoce e anuncia tristo cu e prome Primera Dama di Aruba, e prome esposa di Representante di Rey como Hefe di Estado Hulandes, a despedi.
Nos ta yama ayo na un Mama pa Arubianonan. Pa un gran dama, cu como Candita nunca e stop di brasa e Arubiano, cu a debolbe su toke humano y cariño.
E prome Gobernador di Aruba, Su Excelencia Felipe Tromp, y su esposa Señora Candelaria Tromp, ta laga atras como herencia, e tarea inmenso di representacion oficial di Cas Real, uni na e tarea inmenso di ta parti di e Pueblo di Aruba cu den nan sosten y ehempel, cu fe den Dios y sentimento legitimo pa e Arubiano, a haci nan inmortal!
