Director señora Magaly Maduro:
ORANJESTAD (AAN) Señora Magaly Maduro, directora di Bureau Sostenemi, den entrevista cu Matutino DIARIO a declara cu e instancia aki ta netamente pa casonan di menornan di edad.
“Si tin maltrato, of ta wordo sospecha di un forma di maltrato, cualkier ciudadano di Aruba, un profesional, un meneer of juffrouw di scol por meld na Bureau Sostenemi. E profesionalnan tin cu pasa e code di conexion, y despues di haci esey nos ta haci investigacion. Si e mayornan ta dispuesto pa traha cu e instancianan e ora ey ta bay trata e caso. Si e mayornan mester expresa cu nan no tin nada di bisa, cu nan ta haci manera cu nan kier, anto e tin cu bay na otro departamento”, señora Maduro a splica.
E ciudadano mes, semper a keda asina cu e por haci e melding, pasobra e instancia a haci un cambio den nan forma di traha, pero no t’asina cu tur cos por dump cerca Bureau Sostenemi. “Si tin algo cu bo mes por haci como ciudadano, como famia, nos ta puntra kico bo mes a haci den a caso caba, pa yuda den e situacion, en todo caso, nos ta yama mayornan pa papia cu nan”, señora Magaly Maduro a señala.
