A duna bunita homenahe na e frontlinernan di Aruba

Minister Dangui Oduber hopi gradici cu Colegio Bon Bini

ORANJESTAD (AAN)– Diabierna merdia Minister di Turismo y Salud Publico a acudi na Colegio Bon Bini den Apollostraat caminda e mandatario a ricibi un homenahe hunto cu frontlinernan, sigui pa un fiesta carnavalesco hunto cu tur e muchanan. E tabata un rato masha alegre caminda e mandatario a gradici e frontlinernan.

Minister Oduber a comparti cu e muchanan, cu e tambe a bishita e Colegio Bon Bini tempo e tabata mucha.

Frontlinernan presente cu a ricibi homenahe tabata entre otro representante di Bureau Rampenbestrijding, DVG, Polis, Ambulance, ImSan y HOH.

Minister a menciona cu e trabou cu a ser haci durante e pandemia tabata un trabou cu a ser haci den ekipo caminda cada un di e frontlinernan tabata tin un tarea sumamente importante. E mandatario a menciona cu e frontlinernan a yuda scapa hopi bida. E la duna palabra nan di danki pa tur sacrificio y amor brinda na nan trabou. Awe Aruba a sali di e pandemia y sin duda esaki ta danki na e frontlinernan.

Minister Oduber a bisa e muchanan, cu nan ta e futuro di Aruba. Pa nan haci nan best na scol, pa dia di mañan nan tin un bon trabou mescos cu nos frontlinernan.