ORANJESTAD (AAN): Diaranson dia 2 di maart 2022 Instituto Pedagogico Arubano (IPA) ta tene un anochi di informacion pa tur persona cu ta interesa pa haci e estudio Bachelor Nederlands als Vreemde Taal na IPA.
E estudio aki ta adapta na nos region di Caribe Hulandes y ta forma docente di segundo grado (tweedegraads) di Hulandes cu ta cualifica pa duna les na alumnonan di EPB, EPI, MAVO y e prome tres añanan di HAVO y VWO.
IPA ta ofrece e estudio Bachelor Nederlands als Vreemde Taal den trayecto largo (voltijd) y trayecto cortico (deeltijd).
E trayecto largo tin un duracion di 4 aña. E trayecto aki ta pa tur persona cu tin diploma di havo, vwo of mbo/EPI nivel 4 of cu ta den examenklas di un di e scolnan menciona.
E trayecto cortico tin un duracion di 3 aña. E trayecto aki ta pa tur persona cu tin diploma di maestro (2e graads of Enseñansa Primario) cu ta duna e materia Hulandes 'onbevoegd' pa minimo 6 ora pa siman den Enseñansa Secundario den aña escolar 2022-2023.
E anochi di informacion lo tuma luga online via e programa Zoom y ta accesibel pa tur persona. E horario ta di 7:00 pm - 8:30 pm. Pa asisti na e anochi di informacion ta masha facil. Locual cu bo tin mester ta un celular, laptop of iPad y naturalmente data of Wi-Fi. Pa participa na e anochi di informacion bay na e link:
Si acaso e pidi bo e meeting ID y e passcode bo ta yena e numbernan akibao.
Meeting ID: 843 6940 9443
Passcode: 670637
Durante e anochi di informacion lo duna informacion general di e estudio Bachelor Nederlands als Vreemde Taal. Ademas di esaki lo elabora riba e procedura y test di admision cu mester cumpli cu ne. E test di admision ta obligatorio pa tur persona cu kier continua nan estudio na IPA. Si bo logra termina e test cu exito, bo lo bira oficialmente un studiante na IPA. Na final di e anochi di informacion lo tin oportunidad pa haci pregunta.
Inscripcion: E ultimo dia pa inscribi pa e estudio Bachelor Nederlands als Vreemde Taal ta 7 di maart 2022. Despues di e fecha aki no por inscribi mas pa aña academico 2022-2023. Esaki pa motibo cu e trayecto preparatorio pa yuda bo pasa e test cu bo lo mester cumpli cu ne, lo cuminsa.
Inscripcion ta tuma luga online. Pa inscribi bishita e website www.ipaaruba.com, bay na aanmelden y scoge pa Toelatingstest Bachelor Nederlands als Vreemde Taal.
Bo tin deseo di bira docente di Hulandes? Bay p’e!
