Jamaica kier sigura turistanan cu e isla ta safe
KINGSTON: Mas di 2.000 trahador di horeca pa e sector di turismo na Jamaica, a wordo vacuna usando un di e tres vacunanan obtenible na nan, na varios centro di vacunathon organiza pa e organizacion nobo di Tourism Vaccination Task Force, den e prome tres dia di nan actividadnan.
E Task Force, cu a wordo lanta pa facilita e vacunamento na tur trahador den sector turismo di e pais, a organiza un serie di vacunathon cu e prome teni dia 30 di Augustus.
E prome dia, nan a vacuna 1.200 trahador na Pegasus Hotel. Despues den dos dia di tempo (2 y 3 di September), Sandals Negril a ricibi 556 trahador di turismo cu a bay busca nan vacuna, y nan por a escoge cua di e tres marcanan cu tin.
Diabierna 3 di September, a usa ballroom di Moon Palace na Ocho Rios, caminda 385 trahador a haya vacuna. Pero algun tempo pasa, Moon Palace a organiza un evento similar unda 320 trahador a wordo vacuna. Te cu awor, 60% di e trahadornan di e Hotel a wordo vacuna.
Ministro di Turismo di Jamaica, Edmund Bartlett y Vice-President di Tourism Vaccination Task Force, esta Clifton Reader tabatey presente na Moon Palace pa mira e proceso di vacunamento, y a gradici e teamnan cu ta trahando hunto, incluyendo e nurse y docternan di sector priva cu ta envolvi den e proceso.
E iniciativa ta uno cu a bin di Ministerio di Turismo como tambe Jamaica Hotel and Tourist Association (JHTA), y e Private Sector Vaccine Initiative (PSVI) pa purba hisa e cantidad di 170.000 trahadornan den sector turistico.
