ORANJESTAD (AAN): Minister Dangui Oduber tabata abordo di e iconico Holland America Line Cruise pa marca e celebracion di su impresionante 150 aña di existencia.
Durante e ocasion importante aki, e Minister Oduber a tin e privilegio di conmemora e 65 aniversario di cu Holland America Line ta bishita Aruba.
Holland America Line a extende invitacion na gobierno di Aruba y tambe na prensa local pa e occasion special aki. Gobierno di Aruba a keda representa pa minister Oduber como tambe Prome Minister Wever-Croes. Di Aruba Ports Authority (APA) tawata tey sr. Marc Figaroa y e Voorzitter Raad v. Commissarissen, sr. David Dubero.
Como parti di e festividad, tur presente a ricibi un paseo exclusivo di e Holland America Line Cruise, unda a presencia di prome mano e dedicacion di e liña crucero pa cu nan operacionnan sostenibel. E bishita no tabata solamente un celebracion di historia, sino un testimonio di e compromiso di e compania pa responsabilidad ambiental.
E punto culminante di e paseo ta e anuncio cu e barco di crucero lo pasa door di un transformacion di diesel pa Gas Natural Liquido (LNG), un paso significativo pa reduci emision di carbon y concentra asina ariba un futuro mas amigabel pa cu medio ambiente. E iniciativa aki ta keda perfectamente alinea cu e mision di ministerio di turismo unda ta enfoca den practicanan sostenibel pa cu turismo di Aruba.
Expresando sentimentonan di alegria y gratitud, Minister Dangui Oduber a comenta, "Ta berdaderamente un honor pa forma parti di e momento historico aki mientras ta celebra 150 aña di Holland America Line. E dedicacion na sostenibilidad demostra awe no solamente ta elogiabel, sino tambe ta establece un precedente pa henter e industria di turismo. Aruba ta orguyoso di ta un socio duradero di Holland America Line y ta mira dilanti na hopi mas aña di colaboracion pa construi un futuro mas sostenibel y consciente di medio ambiente."
Pa clausura, Minister Oduber a extende felicitacion sinceramente na Holland America Line pa e logro significante aki. E celebracion di historia di nan 150 aña, tambe nan aniversario di ta bishitando nos dushi isla pa 65 aña, hunto cu un vision pa un futuro sostenibel, ta marca un momento di triunfo pa tanto Holland America Line como pa e perseguimento global di turismo sostenibel.
