For di su nacemento DIARIO a adverti contra un solo pilar economico
*Na entrada Cuaresma 24 beachnan ta topico di preocupacion mundo
ORANJESTAD(AAN)—Existencia di DIARIO ta directamente mara na existencia di Aruba como pais autonomo den Reino, cu mester carga su propio responsabilidad nacional comparti cu e responsabilidad individual di ciudadanonan.
Ora mira atras riba historia economico di Aruba, ta mira e explosion economico causa pa entrada di refineria pa petroleo, cu a bira un nucleo economico pa mundo como ala nobo di sector di mina di por ehempel diamante.
Na e momento cu Status Aparte a haya forsa na Aruba na añanan ochenta, por mira con turismo moderno, a bira segundo fuente economico di e pais, cu asina a cana riba dos pia, loke a haci cu na momento cu Lago a cera su portanan, Aruba ya tabata un destinacion conoci riba mapa economico mundial.
Cu economia no por ta basa riba un solo sector, ta loke DIARIO a sigui argumenta mientras sector di turismo a bira e base economico di Aruba cu a conoce un crecemento gigantesco.
Pa por duna guia na un Pueblo, DIARIO tabata tin e deber, pa mustra Pueblo continuamente riba e importancia di diverisifcacion economico, sigur na momento cu destinacionnan turistico mundial importante, a conoce problema di cambionan y exigencianan di naturalesa pero tambe cambio den economia mundial.
Como argumento na añanan 80, DIARIO a papia di destinacionnan sumamente popular den region di Caribe mes y na entre otro Mediteraneo, cu pa motibo di desaroyo mundial, a wordo reemplasa of a perde exclusividad den mundo turistico.
E productonan mas importante cu Aruba a ofrece na turismo mundial tabata na prome lugar e Arubiano cu ta centro di e concepto Arubianismo, y e naturaleza unico di Aruba, manera e beachnan, pero tambe e parti Noord cu entre otro Natural Bridge y sigur e regalo di Bubali.
Naturaleza a entrega Aruba prosperidad pero tambe tradicionnan mara na beach cu den Cuaresma ta bira atractivo y ta uni su mes na e cantidad di turistanan, cu ta bishita Aruba.
E momento a yega, sinembargo, pa tur hende realisa e cambio di clima cu haci su entrada y cu lo tin impacto riba loke awe ta e alma di economia di Aruba, cu a hiba un maneho den cual diversificacion ta wordo busca cu industria moderno den forma di hidrogeno, cu mester reemplasa petroleo.
Cuaresma ta dilanti porta y lo hiba hende beachnan, cu awor aki ta yena cu turistanan tambe cu ta goza di e naturalesa di Aruba cu mester wordo preserva den un clima di cambio, cu ta exigi tambe pa hende percura pa nan mes y proteha nan mes contra loke cambio di clima ta produci hasta na e momentonan mas grato di nos bida.
Proteccion di naturalesa ta cuminsa cu proteccion di hende, cu proteccion di e producto mas importante cu Aruba conoce pa su turismo, cu ta e hende, cu mester cuida su salud den e mundo di cambio cu paso a paso den tur temporada DIARIO ta ilustra.
