Trabounan andando na veld di Madushi Stars na San Nicolas

Minister Endy Croes

ORANJESTAD(AAN): Recientemente, Minister Endy Croes a bishita e veld di Madushi Stars pa mira e progreso di e trabounan cu ta andando. Manera ta conoci, algun luna pasa a baha e luznan bieu pa aloca e luznan led ultramoderno di e marca Phillips.

   E luznan LED ta bon protegi contra saltpeter y ta “marine coated” pa asina nan por wanta hopi aña. Tambe a laga traha bracket completamente nobo. Siman pasa a instala e luznan, cual ta midi un averahe di 500 lux cu ta cuadra cu e standardnan internacional. Ademas di esaki, lo verf ful e veld. Despues cu finalisa e trabounan lo haci apertura oficial di e veld. “Por a nota cu e famianan den bisindario, esnan cu ta atende cu e veld y nos amigo Sr. Remigio Kock ta hopi contento cu e proyecto aki”, Minister Endy Croes a expresa.

   Finalmente, e mandatario di Deporte a indica cu tin varios proyecto cu ser ehecuta caba pa deporte en general di Aruba y varios proyecto cu ainda ta den proceso.