Diesun atleta di Shotokan Karate Do International a representa Aruba den Miami Open Tournament  

*E karatekanan a trece 7 medaya di oro, 4 di silver y 6 di brons.

ORANJESTAD (AAN): Recientemente, Minister di Enseñansa y Deporte Endy Croes a ricibi bishita di team Shotokan Karate Do International Aruba na Bestuurskantoor. Sensei Gustavo Velasquez, Sensei Juan David Velasquez y 11 atleta a biaha di 16 di mei pa 21 di mei na Merca pa e competencia di Miami Open Tournament.

            Durante e competencia aki, e atletanan a bin cu un total di 17 medaya: 7 di oro, 4 di silver y 6 di brons.

            Durante e ocasion special aki, Minister Endy Croes a entrega nan un handbag di Premio Excelencia den Deporte (PED) y medaya di 4D, esta deseo, disciplina, determinacion y dedicacion. Sensei Gustavo ta gradici tur mayor y compania cu a contribui pa haci e biahe aki posibel.

            Minister Endy Croes ta felicita Sensei Gustavo Velasquez y Sensei Juan David Velasquez pa e tremendo trabou cu nan a haci pa prepara e atletanan aki pa representa Aruba dignamente den exterior.

            Pa finalisa, e mandatario di Deporte ta felicita e atletanan cu a destaca den Miami Open Tournament y pone Aruba su nomber den halto.