Team di Legends a gana Quisqueya cu score di 10-6

Campeonato Liga 40 organiza pa Criollo Reds

ORANJESTAD (AAN): Recientemente a tuma lugar e ceremonia inaugural di Liga 40 di Softball na Aruba.

   Y ya caba weganan a start!  Den un di e weganan, e team di Legends a mansa team di Quisqueya mientras team di Piratas a silencia team di Kibaima.

   Diadomingo ultimo a inicia e promer campeonato official di Liga 40 riba veld di Olimpic desde 2020 cu e Pandemia a bati na nos porta. Criollo Reds Softball Team  organizadornan di e campeonato aki a percura pa un bunita apertura cu 10 equipo participando. Robby Koolman e motor tras di esaki hunto cu su Directiva a traha incansabel pa pone Liga 40 cuminsa draai atrobe. Durante ora di mainta Parlamentario Endy Croes a duna acto di presencia a hiba un speech y a lansa e promer bala como señal cu campeonato a inicia.

   Den e promer wega Legends a mansa Quisqueya por completo net riba e dia cu Republica Dominicana ta celebra dia di tata. Legends 10 careda, 12 hit, 2 error mientras Quisqueya 6 careda, 12 hit y a comete 7 error.

   Melchor Abreu ta resulta pitcher ganador y Gregory Paulina ta bay cas cu e derota. Mihor bateadornan pa Legends ta Edgar Flanegin 3-3, Giovanni Maduro 3-3, Gregory Pilin Krosendijk di 4-2. Pa  Quisqueya a luci na plato Lenny Ashby, Javier Ras y Arnardo Perez tur di 3-2.

   Den e di dos wega e equipo di Piratas si a celebra dia di tata cu un victoria derotando Kibaima. Piratas 11 careda, 14 hit, 0 error. Kibayma 5 careda, 11 hit, 2 error. Pitcher ganador Harrison Dirksz mientras Freddy “Pochi “ Maduro ta bay cas cu e derota. Mihor bateadornan pa Piratas ta Harrison Dirksz 3-3, Andy Moñoz, Leonilo Cocom y Leyvis Gonzalez tur di 3-2.

   Pa Kibaima a destaca na homeplate Robertico Boekhoudt 2-2, Renny Hernandez 3-3, David Eusebius 3-1 cual bataso tabata un cuadrangular. Weganan ta continua diadomingo awor desde 10 di mainta cu 5 candeloso partido na veld di Olimpic den curason di Sta Cruz.