Resultado di rond 6 di Campeonato di Dam di Aruba

ORANJESTAD(AAN): Diaranson anochi a tuma lugar e di 6 rond den Campeonato di dam di Aruba pa 2021.

Na mesa 1, Ricky Nisbet a enfrenta Chester Berkel y a sali ganador di e partido.

Den un otro wega na mesa dos, Dennis Kelly y Daniel Diaz a hunga un wega preta contra otro, unda cu ambos tabata tin chens pa gana e wega.

Na final tabata Diaz kende a bay cu e punto.

Na mesa 3, Obi Tromp a perde di Delbert Alexander, na mesa 4, Eugenio Filiciana a perde di Hector Winterdal y na mesa 5 e wega entre Annelaine Jacobs y Octavio Croes no por a wordo hunga, pasobra Annelaine no tabata presente.

E wega lo wordo hunga na otro ocasion.

Na mesa 6, Elogio Croes a empata su wega contra e lider actual di e torneo Mario Jansen y na mesa 7, Ricardo Wever a gana di Rolin Croes.

Despues di 6 rond, e tabla di posicion ta como lo siguiente: 

Delbert, Alexander y Mario Jansen ta na prome lugar cada un cu 11 punto, mientras cu Ricardo Wever ta sigui cu 9.

Tin ainda 3 wega atrasa cu mester wordo hunga.

Awenochi  ta bay tin e proximo weganan: 

Rolin Croes vs Ricky Nisbet, Mario Jansen vs Ricardo Wever, Octavio Croes vs Elogio Croes, Hector Winterdal  vs Annelaine Jacobs, Delbert Alexander  vs Eugenio Filiciana, Daniel Diaz  vs Obi Tromp y Chester Berkel vs Dennis Kelly.

E weganan ta cuminza 7’or en punto na e club na di Dam Arowak na Nieuwstraat 11, Oranjestad.