Taekwondo Team Aruba a participa na Scrimmage y Toy Drive na Merca

ORANJESTAD (AAN): Siman pasa e atletanan di Taekwondo Team Aruba a bay Merca pa training y educacion di Taekwondo y a caba na un Scrimmage cu participacion di 4 scol di Taekwondo.

E atletanan a entrega un regalo pa e Toy Drive cu lo wordo entrega na "Miami Inner City Youth" pa e dianan di fiesta.

Grand Master Melvin Rasmijn y Master Yoshmar Wever a coach e team di Aruba durante e scrimmage. E atletanan di Taekwondo Team Aruba a bringa for di mainta 10'or te cu 3'or di atardi cu un pauze di 30 min.

Grand Master Melvin Rasmijn head di Taekwondo Team Aruba y Master Yoshmar Wever trainer y coach di Taekwondo Team Aruba a observa cada movimiento di e atletanan durante nan training y scrimmage. Tur anochi despues di training a reuni cu e atletanan y papia tocante training. E atletanan di Taekwondo Team Aruba tabata train dos biaha pa dia.

Grand Master Melvin Rasmijn ya caba tin un plan traha pa locual ta aña 2026 pa e atletanan cu ta cuminsa na luna di Januari te cu December 2026.

Taekwondo Team Aruba ta gradici Master Antwuan Wilson pa tur locual e ta haci pa e atletanan di Taekwondo Team Aruba. Tambe ta gradici tur mayor y tur e automobilistanan cu a contribui pa e atletanan por a realisa e biahe aki.