Campeonato Nacional di Hisamento di Peso teni recien a resulta exitoso

ORANJESTAD (AAN): Diadomingo 30 di November 2025, Aruba Amateur Weightlifting Association a tene nan Campionato Nacional di Hisamento di Peso.

Esaki a tuma lugar den Compleho Deportivo Frans Figaroa na Noord. Esaki ta enconnecion cu Siman Deportivo di Aruba Sport Unie.

   Paisnan cu a participa den nos magno evento ta Canada, Colombia, Curaçao, Ecuador, Merca, Guatemala y Aruba mes. Presente na e Campionato Nacional di Hisamento di Peso tabata Señora Nicole Hoevertsz, Vice Presidente di Comite Olimpico Internacional y Secretaria General di Comite Olimpico Arubano cu a duna un discurso y a desea tur e atletanan hopi exito den nan competencia. Tambe presente den e evento aki tabata Sr. Patrick Vrolijk cu ta Vice President di Aruba Sport Unie.

   Den e campeonato aki a worde hisa den categoria di masculino y femenino den categoria di Youth, Junior, Senior y Master.

   Por bisa cu e atletanan a competi bon mes y nan tabata hopi motiva y varios di e atletanan a sa di kibra nan propio record personal y varios di nan a logra bira campion den nan categoria.

   Aki ta sigui e resultado den femenino Youth categoria di 44kg e atleta for di Canada Aurora van Ulft di apenas 12 aña ta logra den snatch 64kg, clean and jerk 84kg pa un total di 146kg ta gana medaya di Oro den su categoria. Den categoria 53kg Youth atleta Laura Tituana for di club CEWLL ta logra den snatch 68kg y clean and jerk 88kg pa un total di 158kg ta gana medaya di Oro den su categoria.

   Den categoria di 58kg tabatin tres atleta unda Ettel Boyce di TNT Gym ta logra gana medaya di Oro cu un snatch 46kg y clean and jerk 64kg pa un total 109kg cu e hisadanan, Ettel a logra kibra su record personal den total cu 13kg. Medaya di Plata a bay pa e atleta Angelle Thode di club RAW a hisa den snatch 47kg y den clean and jerk 60kg pa un total di 107kg y medaya di Brons a bay pa e atleta Sydney Maldonado di Merca cu a logra snatch 28kg y clean and jerk 42kg pa un total di 70kg.

   Den categoria di 69kg medaya di Oro a bay pa e atleta Maria Alejandra Zuluaga Marin di gym Alpha Box cu a snatch 68kg y clean and jerk 90kg pa un total di 158kg. Medaya di Plata a bay pa Wendy Maduro di TNT Gym ta hisa den snatch 48kg y clean and jerk 62kg pa un total di 110kg. Cu e hisadanan aki Wendy ta logra kibra su record personal den total cu 20kg. Medaya di Brons a bay pa e atleta di Ecuador Nila Campoverde Avila cu a snatch 25kg y clean and jerk 33kg pa un total di 55kg.

   Ultimo atleta den categoria di femenino nos ta haya e atleta Scarleth Ucelo Marroqui for di Guatemala cu a hisa den categoria mas di 86kg ta gana medaya di Oro y ta logra den su hisadanan den snatch 85kg y clean and jerk 115 pa un total di 200kg

   Den categoria di masculino e resultado nan ta lo siguiente for di Curaçao Yhurssen Molenaar den categoria 65kg ta gana medaya di Oro cu su hisada den snatch 80kg y clean and jerk 100kg pa un total di 180kg.

   Den categoria di 88kg Laertes Araque di TNT gym ta gana medaya di Oro logrando den snatch 110kg y clean and jerk 150kg pa un total di 260kg. Medaya di Plata a bay pa Yunes Guzman di club RAW ta snatch 100kg y clean and jerk 130kg pa un total 230kg.

   Den categoria di 94kg Medaya di Oro ta bay pa Lynell Koolman di club RSL ta logra den su hisadanan den snatch 105kg y clean and jerk 135kg pa un total 240kg, medaya di Plata ta bay pa e atleta Gonzalo Ramirez di club E2Rep cu a snatch 70kg y clean and jerk 105kg pa un total di 175kg.  Rene Rudel cu a faya tres biaha den snatch y a clean and jerk130kg, pero no ta logra pone un total.

   Den categoria di 110kg Jeremy Dijkhoff di club PSA ta gana medaya di Oro cu un snatch di 101kg y clean and jerk 141kg pa pone un total 242kg y por ultimo nos ta haya e atleta di Curaçao Guruwan Samaroocu a hisa den categoria di mas di 110kg ta logra den snatch 70kg y den  clean and jerk 100kg pa un total di 170kg ta gana medaya di Oro.

   Tambe a parti trofeo de categoria di femenino Youth como ganador absoluto a sali na di prome lugar a bay pa e atleta Aurora van Ulft for di Canada, trofeo pa segundo lugar a bay pa Delary Lara Tituana di Ecuador y trofeo na di tres lugar a bay pa atleta Sydney Maldonado for di Merca.

   Como ganadornan den categoria di Junior un solo ganador absoluto trofeo pa prome lugar a bay pa Angelle Thode di gym RAW.

   Den categoria di Senior femenino como ganador absoluto trofeo na di prome lugar a bay pa Scarleth Ucelo Marroqui di Ecuador, segundo lugar trofeo a bay pa atleta Maria Alejandra Zuluaga Marin di Alpha Box y tercer lugar trofeo a bay pa e atleta Ettel Boyce di TNT Gym y den categoria di Master como ganador absoluto ta gana trofeo na prome lugar a bay pa Wendy Maduro di TNT Gym y segundo lugar a bay pa Nila Campoverde Avila for di Ecuador.

   Den categoria di masculino como ganador absoluto trofeo na di prome lugar a bay pa e atleta Laertes Araque di TNT Gym, segundo lugar trofeo a bay pa e atleta Lynell Koolman di RSL y trofeo na di tres lugar a bay pa e atleta Yunes Guzman di RAW

  Por ultimo den categoria di Master como ganador absoluto na di prome lugar trofeo a bay pa e atleta di Curaçao Yhurisen Molenaar y segundo lugar trofeo a bay pa Lynell Koolman di Gym RSL

   Trofeo y medaya a worde entrega door di Señora Nicole Hoevertsz y Señora Monica Fajardo miembro di Comite Olimpico Arubano na e atletanan femenino y masculino.

   Aruba Amateur Weightlifting Association ta manda palabra di gradicimento na tur atletanan, clubnan y paisnan Canada, Colombia, Curacao, Ecuador, Merca y Guatemala pa nan participacion y pabien tambe na tur e atletanan cu a kibra nan record personal y tur cu tabata envolvi den e evento aki ta e voluntarionan, entrenador, refereenan y e publico cu apoya e atletanan te na final pa esaki bira uno exitoso.

   Pa no lubida Palabra di gradicimento ta bay na e sponsernan di e Campionato Nacional di Hisamento di Peso cu ta Stichting Sportsubsidie Aruba, Lotto pa Deporte y Aruba Sport Unie.