SPEEDWORLD 26SEP2021

Saludos cordial pa tur hende amante di deporte di motor, bon bini un biaha mas na un otro seccion di SPEEDWORLD.

   E biaha aki, ta bay elabora riba e fabuloso Mazda RX-8 cu e team di Justin Racing ta preparando aki na Aruba, pero na final e auto di careda aki su destino ta Puerto Rico y posteriormente pa Merca.

   Diasabra Justin Racing a tene un evento di bende cuminda crioyo combina cu un Mini-Car Show na Piedra Plat, y a nota cu hopi hende a bay cumpra nan Carni Stoba, y haya chens di mira e RX-8 aki di cerca.  SPEEDWORLD a mira basta hende ta saca potret di e motor.

   Den un entrevista cu Humphrey Kock, e ta contento cu sosten cu pueblo a duna Justin Racing pa recauda fondo, y a haya bon comentario di su car show chikito. 

   El a confirma cu e auto di su yiu Justin, esta e RX-8 ta cla y awor ta buscando e prijs pa pronto e bay San Juan (Puerto Rico), pasobra esey lo bira e home base pa cuminza bira competitivo riba pista di dragracing.

   Ora e yega Puerto Rico, lo cuminza core cune eybao pa test e, pa asina e yega na e secondenan necesario riba e 1/4 mile.

   SPEEDWORLD a compronde cu esnan na Puerto Rico for di hopi dia caba ta sperando e auto aki yega for di Aruba.  Nan ta anticipando e velocidad y horsepower cu e rotary aki lo produci.  Y ademas, e vehiculo aki tin algun pieza poni riba dje, cu e otronan na Puerto Rico no tin.  E ta algun cambio cu lo pone tur hende rek cabez pa mira con e ta move riba pista na Puerto Rico. 

    Segun Kock, e motor tin pa core ainda!  Awor cu e tin tur intake, su headers nobo traha pa Julien Machine Shop, etc., traha na Aruba mes, cu adjustable clutch, e auto a worde full restock di nobo, cu carbon fiber completo.  El a haya un bachi nobo, y na Aruba a repasa tur cos bao di dje, pues el a haya differential nobo, tie-rod ends, y e ta sondeando e prijs pa Dios duna forza, pa 2022 e ta rumbo pa Puerto Rico y despues Merca.

   E idea ta pa bay Merca cune.  Freddy Bareto di Marshall Dyno Service ta bay test y fix e dyno, y lo keda cune tambe pa algun tempo.  Lo bay test na e pista di Salinas prome, y a base di e test nan lo bay haci ahustenan riba dje.  Su frutonan tey, na Curacao e ta na 1.01 riba ciento pia, y na Aruba e mas malo 1.10 y lo mihor tabata 1.02.   Y esey ta ora e motor no tabata drecha ainda, ni cu e turbo grandi poni riba dje.

   E chassis di e RX-8 ta uno RJ Race Car di Ray Jones, y arma door di Paco Croeze na Aruba.  E auto a wordo arma cu tur cos di Ray Jones, pues e throttle, pro-mod muffler, driveshaft grandi, awor ta Fueltech FT500 ta pone aden, y di eynan subi pista.  Freddy lo ta esun cu ta tras di stuur, pa haci e setting mas facil.  Despues Humphrey Kock lo pasa su licencia pa e tambe por core na Puerto Rico y Merca.

   Ora cu keda cla na Puerto Rico, e auto aki lo bay Maryland (Merca) prome, y despues lo pasa pa otro estadonan.