CFU Girls U14 awor ta parti e 'Wall of Rising Stars'

ORANJESTAD (AAN)- Diabierna, na Paseo Herencia tabata tin e honor di inclui e team ganador di Caribbean Football Union (CFU) Girls Challenge Series riba Paseo Herencia su Wall of Rising Stars.

E ceremonia a tuma lugar riba Plaza Padu y a wordo presenta dor di Ruben Garcia como MC y Marketing Manager di Paseo Herencia Zaira Orman-Maya unda cu a reconoce e atletanan y elogia nan logro den exterior.

Prome bes den historia e team U-14 a competi den e Caribbean Football Union (CFU) Girls Challenge Series na Republica Dominicana durante luna di augustus 2021 y a logra bin cu e titulo maximo.

E academia di damas a wordo forma na May 2021, door di Dyane Wiersma di AVB,cu meta pa por desaroya un team di futbol di damas hoben na Aruba. E team ta consisti di 18 mucha muher y 7 staff technico y a gana cu 23 gol na favor y 0 contra durante e campeonato.

Durante e anochi, Minister di Enseñanza y Deporte Mr. Endy Croes y Vice President di IOC Sra. Nicole Hoevertsz a duna palabra di elogio na e hobennan. President di AVB Mr. Randolf Lacle y Head Coach – Sra. Milvienne Henriquez huntu cu Team Manager Sra. Dyane Wiersma a duna un speech tambe di e team su bon trabao, dedicacion y logro. E team completo a ricibi varios regalo di algun di e tiendanan.

Den presencia di famia y amigonan, a devela e potret di e team despues di a sali campeon riba e Wall of Rising Stars. E Wall of Rising Stars ta situa na entrada di Paseo Herencia y ta inclui varios atleta hoben cu a destaca den deporte den e ultimo 10 añanan. Esaki ta e prome biaha cu un team di mucha muhe a wordo inclui riba e Wall of Rising Stars.

Paseo Herencia un biaha mas kier felicita e team completo cu nan logro y ta desea nan hopi exito den nan futuro y pa sigui ta un bon ehempel pa nos hobennan.