E gran anochi di Premio Excelencia den Deporte a yega

Exito na e 130 nominadonan

ORANJESTAD (AAN): E anochi mas grandi den deporte di Aruba ta tuma lugar awe Diabierna anochi, unda cu ta reconoce e atletanan cu mas a destaca den nan disciplina pa aña 2022.

   Un total di 130 atleta ta nomina den diferente categoria. Un total di bintinuebe Federacion a manda nomber di nan atleta cu mas a sobresali. Pa prome biaha a introduci e categoria entrenado di aña unda cu lo reconoce 27 entrenado pa nan contribucion den e desaroyo di deporte di Aruba.

   Durante e anochi di gala aki ta rindi homenahe na 10 baluarte deportivo cu a dedica gran parti di nan bida na desaroyo di deporte di Aruba. Tambe, siete atleta olimpico lo ricibi un certificado y pin for di World Olympians Association pa nan esfuerso y pa promove e balornan olimpico.

   E anochi di gala ta tuma luga awe Diabierna anochi, 10 di november den e luhoso Renaissance Convention Center, cuminsando 8 or di anochi. Pueblo di Aruba ta keda cordialmente invita pa sintonisa e anochi mas grandi den deporte di Aruba en bibo a traves di Canal 22 y pagina di Facebook di Gabinete Wever-Croes.

   E potretnan aki ta saca durante e anochi di Pre-Final cu a ser teni Diaranson den cuadro di Premio Excelencia den Deporte.