Como 1.200 atleta participando di 40 pais na Aruba Open Beach Tennis

Como 70 mil Dollar na premio

ORANJESTAD (AAN): Diahuebs atardi, durante conferencia di prensa Minister di Enseñansa y Deporte Endy Croes hunto cu e organizado di e tremendo torneo internacional Aruba Open Beach Tennis, Sjoerd de Vries a anuncia cu e di 13 edicion di Aruba Open Beach Tennis ta cuminza Diadomingo.

   Tambe presente den e ocasion aki tabata Señora Tita Iglesias di Aruba Tourism Authority (ATA), representante di Caribbean Mercantile Bank (CMB) Sr. Ilán Lopez y atleta local Señora Maria Buuts y Sr. Wayne Tromp. Aruba Open Beach Tennis ta e torneo deportivo di mas grandi di Aruba y ta patrocina pa Aruba Tourism Authority (ATA) cu ayudo di Gobierno di Aruba, diferente departamento di gobierno y stakeholder cu ta contribui pa haci e torneo aki posibel.

   E evento ta premira di ta hopi grandi, cu alrededor di 1.200 atleta participando di 40 diferente pais y un total di 70 mil US$ na premio. Tambe, lo tin un grupo di referee profesional di Italia na Aruba pa dirigi e torneo aki. E aña aki a traha un tribuna mas grandi, unda por aloca mas di 700 hende. Tin un total di 36 cancha y ta spera di tin rond di 3 mil partido di diferente categoria, entre otro, pro, avansa, intermedio y principiante.

   Minister Endy Croes ta felicita Sr. Sjoerd de Vries, ATA, tur stakeholder y Gobierno di Aruba cu a contribui den gran evento deportivo aki. Pueblo di Aruba ta cordialmente invita pa bin apoya nos atletanan durante e siman di torneo di Aruba Open Beach Tennis 2023. Minister Endy Croes ta desea tur atleta hopi exito.