Apertura oficial di Torneo Internacional “Baseball in Paradise”

ORANJESTAD (AAN):  Den un ambiente yena di energia, deporte y union internacional, Minister di Deporte, mr. Gerlien Croes,

a forma parti di e apertura oficial di e torneo internacional di baseball “Baseball in Paradise”, cu a tuma luga dialuna anochi na Pos Chiquito Ballpark.

E torneo a reuni mas di 400 pelotero for di diferente pais, incluyendo Boneiro, Corsou, Hulanda, Sint Maarten, Mexico, Republica Checa y naturalmente, Aruba como anfitrion orguyoso. E edicion di e aña aki ta mas grandi cu nunca, y pa prome bes ta inclui tambe softball femenino den su programacion.

Durante e ceremonia di apertura, tanto Minister Gerlien Croes como organisado Shurty Tremus a hiba palabra pa expresa gratitud na tur e organisacionnan di baseball cu durante e ultimo cinco aña a traha sin para pa crece e torneo aki. “Cada aña e ta bira mas grandi, mas structura y cu mas pais cu kier participa”, Minister Gerlien Croes a bisa, agregando cu e torneo aki ta sirbi como inspiracion pa nos hobennan y ta fortifica deporte na Aruba riba nivel internacional.

Minister Gerlien Croes tambe a tira e prome bala simbolico pa oficialisa apertura di e torneo aki, cu Shurty Tremus mes como catcher — un momento pleno di orguyo y simbolismo deportivo.

E resto di e siman aki lo ta yena cu weganan di baseball y softball na diferente tereno deportivo rond di Aruba, caminda comunidad ta invita pa yega e terenonan deportivo aki y apoya nos deportistanan.

Minister Gerlien Croes ta desea tur ekipo, coach y organisadonan un torneo exitoso y fructifero, y ta expresa su gratitud na e patrocinadonan pa nan apoyo continuo na deporte di Aruba.