DOW ta informa
ORANJESTAD (AAN): Tin algun persona cu ta keda stagna ora di pidi permiso pa cuminza cu construccion di nan cas. Via di DIARIO, por lesa recomendacion di DOW pa ora cu bo ta bay haci peticion pa e permiso aki.
Ki ora bo permiso di construccion ta wordo considera otorga y loke esey significa: Bo permiso di construccion ta wordo considera otorga ora Departamento di Obra Publico informa bo persona por escrito (of via e-mail) cu e permiso ta cla ta busca.
Despues di esey, e siguiente regla-nan ta wordo aplica: (*) No ta permiti pa haci ningun cambio mas den e mesun number di permiso. (*) Despues cu DOW a manda e notification cu e permiso ta cla, no por haci cambio substancial na e plannan di construccion. E permiso ta basa riba e mapa di construccion entrega.
Si acaso toch bo kier haci cambio, tuma nota cu e ora bo tin di bay entrega un peticion nobo pa permiso di construccion.
Si bo persona kier ahusta algo, bo mester entrega un peticion di nobo tambe. E ora e permiso bieu lo wordo retira.
Si acaso e permiso no a wordo busca: Si e permiso otorga no a wordo busca den 180 dia, e lo wordo automaticamente cancela y lo mester haci un peticion completamente di nobo cu tur e rekisitonan.
Pa mas informacion tocante nos permiso di construccion y cua documentonan mester tin pa haci e peticion, subi nan website na dow.aw.
