Señor Herrick Henriquez, Director di Asociacion ATIA:
ORANJESTAD (AAN): Den un entrevista recien cu DIARIO, señor Herrick Henriquez, Director di Asociacion ATIA, a indica cu tin varios factor cu por influencia e ahustamento di prijs den supermercadonan na Aruba. Entre e motibonan ta inclui, por ehempel, e hecho cu e prijs di un producto por baha ora cu e ta cercando su fecha di expiracion.
Departamento di Asuntonan Economiconan ta haci control di prijs solamente den cierto supermercadonan. Nan ta compara mesun productonan pa un macuto di compra den diferente supermercado pa investiga e prijsnan. Sinembargo, segun señor Henriquez, e supermercadonan ta keda competi entre nan mes pa mantene e prijs atractivo pa e consumidor.
El a enfatisa tambe cu ta importante pa sigui educa e consumidor pa por haci nan compra na un manera mas eficiente, sin mester gasta gasolin y bay di un supermercado pa otro pa busca e producto mas barata. Si un supermercado ta pone su prijs y un otro cerca ta ofrece e mes producto mas barata, e consumidor mes mester dicidi unda e kier cumpra.
“Mester stop di culpa comercio pa e bira mas husto pa tur hende. Gobierno, comerciante y consumidor mester traha hunto pa nos pais draai bon”, señor Henriquez a expresa.
