Parlamentario Endy Croes ta cuestionando...
- LED Screen pa Stadion na Dakota ta un P4.81 Defenders Series Outdoors cumpra na China
ORANJESTAD (AAN): Parlamentario Endy Croes a constata cu Minister Gerlien Croes ta gobernando cu “odio y repudio”, mustrando esaki publicamente pa di dos biaha den Parlamento door di expresa su mes contra tur ekipo y material fabrica na China. Segun Croes, e actitud aki ta lanta e impresion cu e mandatario tin algo contra e colonia Chines, un echo cu e parlamentario ta lamenta profundamente, mirando cu e comunidad Chines ta masha keri na Aruba y nan aporte na nos economia ta uno substancial.
Banda di esaki, China ta e potencia mundial den exportacion; nan a exporta 3.8 triyon dollar na material pa mas di 210 pais rond mundo durante aña 2025, di cual 1.1 triyon tabata na ekiponan electronico. Pues, ta incomprendibel e repudio constante di Minister Gerlien Croes “contra materialnan cumpra na China”.
Renobacion di Compleho Deportivo Guillermo Prospero Trinidad: Desde februari 2023, e ex-minister e tempo ey hunto cu Gabinete Wever-Croes II a anuncia e comienso di e renobacion di Stadion Guillermo Prospero Trinidad (GPT) na Dakota. E proyecto aki a wordo realisa den varios fase, mirando e estado den cual e stadion tabata prome. Pa por a logra cu FIFA haci un inversion miyonario den e 7 veldnan di nos
clubnan local cu lo haya yerbe artificial, FIFA a pone 2 condicion fundamental cu Gobierno a priminti di cumpli cu nan:
(1) Certificacion di Veld y Luz: Gobierno mester a renoba e cancha di GPT cu yerba artificial certifica pa FIFA y instala luznan cu mester alcansa 1000-1200 lux. Desde aña 2024, FIFA a acredita e yerba y Gobierno a cumpli cu e luznan nobo cu ta duna 1200 lux. Asina a cumpli cu e prome condicion.
(2) Siguridad Legal pa e Clubnan: Gobierno mester a traspasa e terenonan di bala pa e 7 clubnan (Nacional, Bubali, RCA, Riverplate, Dakota, Estrella y La Fama) pa un minimo di 30 aña riba nomber di e club mes. Gobierno a encamina e proceso aki pa cumpli cu e traspaso di e 5 huurgrond y dos erfpachtnan.
Banda di esaki, a haci mas inversion pa upgrade e stadion. Deporte di Atletismo tambe a haya
atencion cu un pista di e marca mundial “Mondo”, cual ta un marca top of the line. Ademas: (*) A kibra un banda di tribuna y renob’e completo. (*) A renoba 2 kleedkamer por completo, incluyendo instalacion di coriente y airco. (*) A renoba ful e area di VIP, alocando mas baño y un cantina cu su bar.
E stadion por a wordo uza caba desde augustus 2024, unda nos seleccion femenino U15 a logra e prome medaya di oro den nos historia. Ora gobierno a cambia, a keda algun trabao pendiente cual a wordo traspasa pa e Minister nobo den e documento oficial. Den e overdrachtsformulier, bou di letter D, a splica ampliamente cu e LED Screen a yega Aruba den luna di maart 2025 y mester wordo instala. Bou di letter C a splica varios otro puntonan di atencion pa asina termina e bunita proyecto aki. Por lo demas, pueblo ta conoci caba cu e actitud infantil di e Minister, unda manera el a drenta a para e proyecto y a coy e yabi di e Stadion hib’e su cas.
LED Screen pa Stadion GPT Dakota: Den Parlamento, na dos ocasion, Minister Gerlien a splica cu e LED Screen cu a wordo cumpra ta via Alibaba y cu e ta un marca Chines cu, segun e Minister, ta un ‘indoor LED Screen’. y Dialuna siman pasa, el a bolbe ripiti esaki den Parlamento pa di dos biaha. Como cu Gerlien tin un “apodo” den boca di pueblo como un gañador, pueblo no ta kere den su
palabranan mas.
Mescos el a gaña Parlamento te cu awe riba e private jet, y ainda no kier contesta ni mustra recibo di su biahe di trabao representando pais Aruba. Gerlien ta mustra un grado di frustracion contra e LED Screen, pasobra esaki a wordo cumpra na un compania na China. E ta baha su frustracion riba productonan Chines, mientras cu China ta fabrica material di bon calidad pa henter mundo. En realidad, e marca di e LED Screen ta un P4.81 Defenders Series Outdoor LED Stadium Screen. Ta trata di un screen grandisimo y bunita, specialmente diseña pa Stadion Dakota. Nos no sa kendenan por a hinca den su cabes cu
esaki ta un indoors screen.
Nos ta lamenta cu e Minister a opta pa laga e screen aki, desde April 2025, benta abao na tera den stadion enbes di a coordina pa arma esaki. Nos lo percura pa haci e preguntanan necesario por escrito pa asina no permiti e ‘capitalvernietiging’ cu e mandatario ta practicando, y nos lo insisti pa laga arma e LED Screen cu ta na Aruba caba desde maart 2025. Dieptriest!
