Rudy Lampe riba 23 Aniversario di Red Democratico
ORANJESTAD (AAN): Dia 30 di mei di aña 2003, Partido RED Democratico Aruba a ser funda. Despues di 23 aña, e partido lidera pa señor Rudy Lampe ainda ta trahando internamente cu su miembronan. Señor Lampe a indica cu tanto su persona como señor Ricardo Croes no a retira di e partido y activamente nan ta reuni cu miembronan y ta conduci programanan den nan seno riba diferente topico.
Pa conmemora 23 aña di existencia di Partido RED, nan lo tin un charla cu lo ta habri pa publico en general. E orador invita pa e charla aki ta mr. Jayburtt Dijkhoff. Señor Dijkhoff ta conoci pa e articulonan cu el a skirbi riba e tema di Ley di Reino, Hofa. Esaki lo ta bay ta e topico tambe na e ocasion aki, mirando cu e ta un topico actual, na unda señor Dijkhoff lo enfoca riba e supervision financiero di parti di Gobierno di Reino pa Aruba.
Señor Rudy Lampe ta haci un invitacion na miembro y votadornan di Partido RED pero na pueblo di Aruba en general, pa asisti na e charla aki cu lo tuma luga den sala di Asociacion Trabao di Hubentud na Aruba (ATHA), Caya Appeldam 2 na Dakota. Orario lo ta di 10 or di mainta pa 12 or di merdia. Entrada lo ta gratis. Tur hende ta bon bini!
