Mensahe di Clifford Heyliger dirigi na MEP:
ORANJESTAD (AAN): Parlamentario di AVP, Clifford Heyliger, a expresa claramente su posicion riba e hayazgonan presenta den e reciente rapport di Algemene Rekenkamer Aruba (ARA) tocante e investigacion di e Jaarrekening Land Aruba 2020 y specificamente e implementacion di e programa di apoyo financiero FASE durante e pandemia di COVID-19.
Segun Heyliger, e contenido di e rapport ta mustra cu e situacion no ta un asunto di percepcion politico, sino un cuestion serio di gobernacion, control financiero y responsabilidad publico. E parlamentario a indica cu e hayazgonan ta documenta iregularidadnan significativo den e forma con a maneha e proceso di FASE, incluyendo falta di suficiente garantia di legalidad financiero y debilidad den procedimento administrativo.
“E rapport di Algemene Rekenkamer ta un documento independiente cu mester trata cu seriedad y respet. No ta trata di politica partidista, sino di confianza publico den maneho di fondo di pueblo,” Heyliger a declara.
Responsabilidad politico y transparencia: Parlamentario Heyliger a critica reaccion di partido oposicion MEP, indicando cu na lugar di asumi responsabilidad politico pa decisionnan tuma durante nan periodo di gobernacion, nan ta purba minimalisa e gravedad di e hayazgonan of desvia e discusion pa otro tema.
Segun Heyliger, e rapport ta indica claramente cu durante e implementacion di FASE no a establece suficiente structura formal pa garantisa control financiero adecua, y cu algun documento clave no tabatin aprobacion formal segun e norma legal aplicabel.
El a enfatisa cu integridad den gobernacion no ta solamente un slogan politico, sino un principio fundamental cu mester demostra den accion y den boluntad pa reconoce eror ora esaki a wordo cometi.
“Si integridad tabata realmente un prioridad durante e periodo di gobernacion, anto mester por para awe y asumi responsabilidad pa e decisionnan y erornan cu a wordo cometi,” Heyliger a subraya, refiriendo na e patron cu, segun e, a caracterisa e reaccion di oposicion ora ta confronta cu indicacionnan menos faborabel.
Impacto riba confianza publico y gobernacion: Parlamentario Heyliger a señala cu e situacion rond di FASE tin implicacion amplio pa confianza di ciudadano den institucion publico. Durante e periodo di pandemia, hopi ciudadano tabata depende di apoyo financiero pa cubri necesidadnan basico, y p’esey e maneho corecto di e fondo aki tabata di importancia critico.
El a recorda cu durante campaña electoral di 2021, MEP a informa pueblo cu lo reemplasa FASE pa un schema nobo, pero despues di formacion di gobierno, e programa a termina sin introduci un alternativa structural inmediato, creando incertidumbre pa beneficiario.
Segun Heyliger, e secuencia di decisionnan y mensahenan contradictorio durante e periodo aki a contribui pa confusion y falta di claridad den comunicacion publico.
Parlamentario Heyliger a conclui cu e resultado di Algemene Rekenkamer mester sirbi como un punto di partida pa un debate constructivo riba gobernacion, transparencia y maneho responsable di fondo publico, sin politisa e proceso ni minimisa e importancia di e echo presenta.
“E obhetivo principal mester ta pa siña di e experiencia, fortalece control financiero y preveni ripiticion di e mesun erornan den futuro. Pueblo di Aruba merece un gobierno cu ta opera cu integridad, claridad y responsabilidad,” Heyliger a declara.
Fraccion di AVP, segun e parlamentario, ta comprometi pa sigui promove transparencia, responsabilidad fiscal y bon gobernacion, cu e meta final di proteha interes di pueblo y restablece confianza den institucion publico di nos pais.
