Parlamentario John Hart:
ORANJESTAD (AAN): Parlamentario di AVP, John Hart, ta indica cu despues di un aña completo, por observa claramente un modus operandi consistente di fraccion di MEP: ora cos ta bira dificil, nan ta core pa nan responsabilidad. E patronchi aki, segun Hart, a bira evidente durante e debate reciente riba Rijkswet HOFA.
Parlamentario Hart a señala cu e retorica politico di MEP ta busca pa distorciona e realidad. E ta recorda cu Rijkswet HOFA a wordo introduci despues di firma di un Bestuurlijk Akkoord na 2024, cu participacion di e mes partido cu awor ta opone e ley.
“Trece un yiu cu yama Rijkswet HOFA na mundo door di firma un Bestuurlijk Akkoord den 2024. E famia den ministerraad tabata contento cu e yiu lo nace, ningun no a opone pa e ley bin, anto despues ora bo drenta oposicion, bo ta rechasa bo mes un yiu. Berdad politicia por ta cruel,” Hart a remarca.
Segun e parlamentario, e tipo di draaiboek politico aki por a traha cu e asina yama militacion of soldatnan di antes ora no tabatin social media of registro digital, pero awendia, cu abundancia di evidencia online, rueda di prensa y documentonan oficial, e intento pa rechasa responsabilidad a bira, den su palabra, “un teatro caduca”.
Fraccion AVP ta reitera cu nan posicion riba Rijkswet HOFA ta cla y consistente, conforme e acuerdo firma den e Bestuurlijk Akkoord. Actualmente, e ley ta sigui su proceso institucional pa evaluacion door di Raad van State, mientras cu e ley local, Landsverordening Houdbare Overheidsfinanciën, tambe ta den analisis door di Raad van Advies.
Hart a enfatisa cu fraccion AVP ta sigui scucha tur stakeholder relevante, incluyendo sindicatonan cu recientemente a presenta nan punto di bista den Parlamento. Un bes cu e consehonan oficial ta completo, e debate publico lo continua den forma transparente.
Parlamentario Hart tambe a referi na un otro ehempel concreto di e mesun patronchi di bula pipa di MEP: e rapport publica door di Algemene Rekenkamer fecha 13 maart 2026. Contrario na e insinuacionnan di cu fraccion AVP lo ta bagatalisa e periodo di COVID-19 of e esfuersonan haci durante pandemia, Parlamentario Hart ta reacciona categoriamente: “Algemene Rekenkamer, como organo independiente, tin un rol fundamental pa garantisa cu fondonan publico ta maneha conforme ley, cu transparencia y responsabilidad.”
Segun e rapport, durante aña 2020, casi 43 miyon Florin den yudansa FASE a presenta iregularidadnan serio. E hayazgonan ta inclui: “entre otro, pago dobel, pago na persona cu ya tabata risibi otro tipo di yudansa, pago na persona cu tabata den loondienst, pago na persona cu a emigra of a fayece, y uzo indebido door di ZZP’ers.”
Hart a subraya cu e contenido di e rapport ta obliga Parlamento pa trata e asunto cu seriedad, mirando specificamente na gobernacion, control financiero y respet pa normanan legal den maneho di fondonan publico.
E parlamentario a informa cu den luna di mei 2026, Algemene Rekenkamer lo presenta su hayazgonan den Parlamento di Aruba, y cu pueblo di Aruba lo tin oportunidad pa sigui e reunion aki.
Finalmente, Hart a critica con un bes e pandemia tabata tra’i lomba, Gabinete Wever-Croes II tabata mas concentra riba promocion di surplus den media, cu den atende e situacion mas urgente, particularmente e situacion vulnerable di hopi persona di edad avansa, Segun Hart, prioridadnan di gobierno mester ta dirigi na bienestar directo di pueblo, y no na promocion politico, specialmente ora e grupo mas vulnerable ainda tabata warda solucion concreto pa nan necesidadnan diario.
