Segun Parlamentario Clifford Heyliger:
- Mescos cu e clientenan ta paga e compania priva
ORANJESTAD (AAN)-- Parlamentario Clifford Heyliger, di fraccion di AVP y miembro di e Comision encarga cu Serlimar, a amplia den entrevista cu Matutino DIARIO, tocante e tema di Serlimar.
“Nos sa cu Serlimar tin cu draai, y mescos cu hende ta paga e otro compania priva, pa recoge sushi, Serlimar no por hacie por nada.
Nos, como consumidor biba den casnan residencial nos ta paga algo y gobierno ta cubri e gasto real of cumpli p’asina por sosode, of e no ta wordo haci. Pero nos sa cu e mester tuma lugar, na un manera of otro”, Heyliger a expresa.
Segun e parlamentario, semper e ta pensa cu mester wak pa e grupo cu cosnan ta cay nan duro, esta e grupo marginal. E ta haya cu no ta berdad cu ningun hende por paga e bak’i sushi, pasobra hopi hende por pag’e, pero tambe tin hopi cu no por paga.
“Pero e cantidad cu por paga ta hopi mas cu esun cu no por paga. Ban busca un solucion elegante pa esnan cu di berdad no por paga. Anto, no laga e problema keda pasobra nos no por maneha e cosnan asina”, el a expresa.
E Parlamentario a reitera cu Serlimar ya caba ta haciendo su parti cu areglo di pago pa esnan cu tin dificultad pa paga, y pa esnan cu ni cu areglo por paga, mester busca un solucion.
“Nos a haya nos prome encuentro cu SERLIMAR despues cu gobierno nobo y coalicion a sinta, y como Parlamento nos a haya sa di nan situacion financiero, con cos ta bayendo, kico ta nan plannan, kico ta nan retonan, y ta awo ta nos trabao di haci preguntanan na gobierno, wak e maneho y djeynan aki un par di luna laga nan bin bek, wak con e desaroyo ta bayendo. Pero ta yega un momento si, cu nos mester contesta e preguntanan y gobierno bin cu un maneho cu ta acapara tur cos, pasobra na final di dia e maneho mester ta un maneho total; limpieza di caminda no ta di Serlimar so, tambe ta di DOW. Pero nos sa cu sushi residencial di 90 pa 95% ta den man di Serlimar, y eynan nos tin cu traha pa Serlimar cumpli cu Aruba”, e Parlamentario a conclui.
