Riba e restauracion di Fort Zoutman:
ORANJESTAD (AAN): E siman aki, Minister Eman a anuncia cu lo cuminsa cu e restauracion di Fort Zoutman den cuadro di e revitalisacion di Centro di Oranjestad. Parlamentario Xiomara Maduro ta haya importante pa pone e cosnan den nan contexto corecto: e restauracion di e toren di Fort Zoutman no a cuminsa como un proyecto di campaña, ni como propaganda politico di Mike Eman, ni di su Gobierno di AVP-Futuro.
E restauracion aki no ta un proyecto di renobacion urbano, sino un proyecto di reconocemento historico conecta directamente cu e disculpa y reflexion pa e pasado di sclavitud den Reino Hulandes.
Origen: disculpa di DNB pa negoshi di sclavitud: Na aña 2022, sr. Klaas Knot, Presidente di De Nederlandse Bank (DNB), a ofrece un disculpa oficial pa e pasado di sclavitud y e rol di DNB den esaki. Como parti di e disculpa, DNB a destina €570.000 na Fundacion Museonan Arubano (FMA) pa restaura e toren di Fort Zoutman y desaroya material educativo pa scolnan, incluyendo historia manera esun di e catibo Virginia.
Parlamentario Maduro ta haya importante pa subraya cu Fort Zoutman, construi na final di siglo 18, ta un simbolo historico di Aruba y un “place of memory” liga cu e historia di sclavitud den region. Esaki ta haci e proyecto relevante den termino di memoria colectivo y educacion. E proyecto di restauracion, por lo tanto, tin su base den reconocimento historico, educacion y consenshi colectivo. E no ta un iniciativa nobo di Gabinete AVP-Futuro, crea pa revitalisa e Centro di Oranjestad.
Proyecto di peso historico y educativo y no di desaroyo urbano: Aunke Minister Eman kier presenta e proyecto di restauracion como un esfuerso di Gobierno AVP-Futuro pa “revitalisa Centro di Oranjestad”, nos mester keda fiel na e echo cu e financiamento y e proposito original ta directamente conecta cu e disculpa oficial y e proceso di reflexion historico. Desaroyo urbano ta importante, pero no mester wordo mescla ni confundi cu un proyecto cu tin un peso historico y educativo asina profundo. “Nos historia no ta instrumento di campaña politico. Ta un legado cu nos tin responsabilidad di respeta, compronde y traspasa na e siguiente generacion cu integridad, berdad y dignidad,” e parlamentario ta expresa.
Exito y gratitud: Parlamentario Maduro ta spera cu Minister Eman por respeta e contexto den cual e restauracion ta tuma luga. “Nos ta desea FMA y Monumentenbureau, hopi exito cu e restauracion. Cada monumento cu wordo restaura den su gloria, ta sigui conta nos su historia. Danki DNB pa pone e recursonan disponibel pa Aruba,” ta e deseo final di e parlamentario.
