Pa defende placa di pueblo, no pa politiconan
ORANJESTAD (AAN): Supervision financiero externo ta mustra un panorama positivo pa Aruba. Pa corda, hasta Hulanda mes ta bao supervision financiero di Brussel. E Rijkswet mester contene dos regla cla:
(1) E deficit di presupuesto no por yega mas cu 1.5% di bruto binnenlands product (BBP).
(2) E debe externo no por yega mas cu 40% di bruto binnenlands product (BBP).
Esakinan ta regla cla pa mara man di politiconan irresponsabel y pa proteha placa di pueblo. Sinembargo, tin partidonan cu ta usa “autonomia” como hustificacion pa sigui keda cu man los y malgasta.
RED den gobierno a defende entrada di e Rijkswet como un ultimo recurso pa para e gasto irresponsabel, pero e votadornan no ta castiga politiconan cu ta malgasta, ma ta sigui premia AVP y MEP – dos partido cu a causa e colapso financiero di Aruba. Mas ainda, Parlamento di Aruba ta un stempelparlement sin control real riba gobierno.
Supervision externo, p’esey, ta un bonbini: pa proteha balor di nos Florin y pa pone regla serio riba maneho di nos finansa.
Autonomia a worde usa hopi biaha pa defende interes di politiconan irresponsabel di AVP y MEP. Awor e momento a yega pa sacrifica un tiki di autonomia financiero, pa defende e interes mas grandi: ‘Placa y futuro di pueblo Arubano’.
