ORANJESTAD (AAN): Ryçond Santos do Nasdcimento, a splica cu por a bin ta mira un degradacion di profesionalismo y
amor pa nos estado di derecho for di momento cu AVP y Futuro a cuminsa negocia nan matrimonio oportunista. Diabierna 29 di augustus 2025 esaki a wordo confirma un biaha mas di forma doloroso durante e reunion cu mester a trata un Rijkswet nobo pa finansas publico. Un biaha mas gabinete AVP-Futuro a dicidi di degrada Parlamento na un organo meramente simbolico.
Durante e reunion, gobierno a presenta pa prome biaha e texto di e Rijkswet HOFA, supuestamente pa busca aprobacion di Parlamento. Pero Mike, Gerlien y Geoffrey nan falta di seriedad a cuminsa for di momento cu Presidente di Parlamento a habri e reunion. Ta te e ora ey nan a duna Parlamento e Rijkswet pa lesa. Pa e motibo ey Jennifer a pidi dos siman pa studia e ley. Naturalmente MEP y PPA mester a rechaza esaki como algo totalmente inaceptabel. Tabata obvio cu e fraccionnan AVP-Futuro kier a crea e aparencia cu nan mester di tempo pa forma nan propio opinion riba HOFA. Pero e aparencia tabata mentiroso.
Esey nos tur por a mira e mesun diabierna ey ora cu via media Hulandes nos por a lesa e documentonan cu ta mustra cu dia 13 di augustus 2025 caba Mike, Gerlien y Geoffrey a yega na un acuerdo administrativo cu Hulanda riba e texto di e Rijkswet. Den otro palabra: nan a bay Parlamento pa hunga “mooi weer”, gaña haci comosifuera cu nan a bay Parlamento pa busca “aprobacion”, mientras cu nan a cera e deal dos siman prome caba.
Esey ta mustra cu Mike, Gerlien y Geoffrey ta reduci nos Parlamento na un stempelparlement. E trabao di e fraccionnan AVP-Futuro no ta nada mas cu aproba ciegamente loke nan lidernan den Gabinete AVP-Futuro ta impone riba nan. Asina nan ta horta Parlamento di tur speransa pa ta un organo cu realmente ta controla y legitima gobierno na nomber di cada ciudadano.
Den un otro articulo mi lo trata e detayenan di e Rijkswet HOFA mes, pero awe nos mester enfatisa e degradacion di e posicion di Parlamento aki. E manera cu Mike y Gerlien ta tuma decisionnan sin mandato di Parlamento, ta mescos cu e manera con Mike a pone Wendrick na nr. 1 di lista di AVP, sin mandato di su mesun partijraad. Ta e mesun practica: tuma decisionnan sin consulta real y despues trata e organo (partijraad of Parlamento) manera un decoracion. E diferencia ta solamente e plataforma, e metodo ta keda mescos.
Anto e fraccionnan di AVP y Futuro ta acepta esaki, pasobra e parlamentarionan ey (cu excepcion di Clifford Heyliger) no por haya e mesun salario ey ningun otro caminda. By the way: esey ta conta pa Gerlien y Wendrick tambe: nan simplemente no tin e competencianan pa e funccion cu nan tin. Hustamente e falta di capacidad ey ta haci cu nan no por otro cu saca potret y hunga cu sentimento di Pueblo. Pero e consecuencia di esaki ta bin pa e ciudadano: Pueblo ta wordo empobreci y nos democracia parlamentario ta wordo conscientemente debilita. Anto nos presidente di Staten, Marlon Sneek, ta simpelmente coopera cu e malhecho aki ora e no ta duna oposicion ni sikiera e chens pa cuestiona e ministernan riba e abuso aki. Sin menciona cu e reunion no tabata iniciativa di gobierno mes, ni di AVP-Futuro, sino di oposicion cu a pidi e reunion mas cu cinco luna pasa.
