Pa RED Democratico loke pueblo duna nan ta mas cu bon ricibi

ORANJESTAD (AAN) – Kinsasha van der Bliek, #2 riba lista di Partido RED Democratico, a wordo acerca tambe despues cu el a deposita su voto na Scol Basico Washington.

El a wordo sorprendi pa un mainta cu un energia hopi halto, cu hopi entusiasmo cu a pone sinti sensacion di barbulet na su stoma, kizas pa nervio y felicidad di sinti un energia diferente.

El a bisa cu e ta spera cu tur hende lo a vota conciente no solamente cu nan ta habri nan wowo, pero tambe nan mente, pa compronde cu no por keda haci mesun cos, y expect diferencia den nos pais. “Nos voto, nos voz ta e poder, y nos ta esnan cu mester crea e cambio den nos pais”, e hoben a expresa. E no tin den mente cuanto asiento RED kier, pero locual cu pueblo lo duna nan, ta mas cu bon bini. Expectativa di RED ta locual pueblo dicidi.