Minister Oduber ta contesta preguntanan infunda y incorecto di Mike Eman y Mervin Wyatt-Ras  

 *Tocante cantidad di personanan cu a fayece den e ultimo añanan.

ORANJESTAD (AAN): Diamars mainta Minister di Turismo y Salud Publico sr. Dangui Oduber ta contesta preguntanan y presenta datos di CBS di e cantidad di personanan cu a fayece na Aruba e ultimo añanan. Recientemente Minister Oduber a ricibi algun pregunta di miembronan di fraccion di AVP sr. Mike Eman y Sra. Merwin Wyatt-Ras, y awe Minister Dangui ta contradeci tur e ponencianan infunda y incorecto haci pa e miembronan di fraccion di AVP.

            Si nos tuma nota di estadisticanan di e cantidad di personanan cu a fayece e ultimo añanan nos por conclui cu hustamente tin un bahada di e cantidad di personanan cu a fayece. Minister Dangui ta lamenta cu sr. Eman y sra. Wyatt-Ras ta mal informa comunidad y crea panico innecesario siendo cu e cifranan mes ta contradeci nan ponencianan.

            Estadisticanan di CBS ta demostra cu e Cantidad di personanan cu a fayece e ultimo añanan ta como lo siguiente:

Aña 2021: 964

Aña 2022: 879

Aña 2023: ta proyecta 800 (te cu di 3 kwartaal di 2023 - 611 persona a fayece)

            Un otro ponencia cu Minister Dangui a contradeci ta cu segun fraccion di AVP, e gobierno aki lo ta cortando den cuido medico. Hustamente e aña aki, esta aña 2024, ta invirtiendo 13.5 miyon florin extra den mehoracion di calidad di cuido y servicio. E 13.5 miyon florin cu a inverti den cuido medico a wordo reparti como lo siguiente:

5.1 miyon florin extra pa Hospital

4.1 miyon extra pa ImSan

1.8 miyon pa Stichting BOB haci bevolkingsonderzoeken pa early detection di cancer di pecho

1 miyon pa respaldo pa asina tuma mas profesionalnan

1.5 miyon pa reenforsa e prome liña di cuido y tambe pa digitalisacion di cuido medico

            Minister Dangui Oduber a contesta tur e preguntanan cual e lo bay entrega na e miembronan di fraccion di AVP. Minister Dangui Oduber ta pone e preguntanan y e contestanan aki pa comunidad por lesa, pa asina na un forma habri y transparente informa comunidad di Aruba debidamente.