Mike Eman, lider di AVP cerca Gobernador Diamars mainta

ORANJESTAD (AAN) – Lider di Partido di Pueblo Arubano “AVP” a bay na su audiencia cu Gobernador, Diamars mainta.

Miembronan di prensa a aborda Mike Eman, despues di e encuentro aki, ya prome cu contesta pregunta, el a expresa su palabranan di gradicimento na comunidad, pa e sosten cu AVP a ricibi.

Eman a bisa cu esaki tabata un eleccion cu hopi reto, AVP su activistanan a traha duro, y su partido a supera hopi reto y a pone un posicion hopi cla, pa por forma parti di e gobernacion di Aruba y e proceso politico importante, cu pueblo di Aruba ta pendiente di dje.

Partido AVP a prepara su mes, grandemente, pa e capacidad den cas pa por maneha e retonan grandi cu Aruba ta para nan dilanti, y a prepara tambe un plan den consulta cu nos comunidad y el a comparti cu Gobernador, cu nos ta mira cu Partido AVP por forma parti di un gobierno cu e partidonan nobo, cu a haya asiento den Parlamento; esta, MAS, RAIZ y ACCION 21.

“Mi ta kere cu Partido AVP y e partidonan aki a para pa un cambio di e gobernacion cu tabata tin, ultimamente. Cada un di nos a articulo cu mester di un cambio den e direccion di e pais. Mester tin crecemento economico, enseñanza mester haya prioridad atrobe, Salubridad Publico no mag di bira victima di e retonan cu nos pais ta pasando aden. Nos mester atrobe, dialogo den nos pais y nos tur, e cuater partidonan a articula e pensamentonan aki”, Lider di AVP, Mike Eman a señala.