Mester sigui enfoca riba desaroyo di solucionnan inovativo y sostenibel pa Aruba

ORANJESTAD (AAN): Diabierna ultimo na IMAX theater nos a celebra ‘SDG Flag Day’. Como Parlamentario Shailiny Tromp-Lee a wordo invita pa participa na un actividad organisa door di e Comicion nacional di SDG.

SDG ta para pa ‘Sustainable Development Goals’ cu ta e metanan pa logra Desaroyo Sostenibel.

Na september 2015 e Asamblea General di Nacionnan Uni a adopta e Agenda 2030 dirigi riba Desaroyo Sostenibel cu tin cu conta pa tur hende cu ta biba riba e mundo aki. Esaki ta conta pa Aruba tambe. 

SDGs ta encera un total di 17 meta cu tin cu fungi como guia pa yega na prosperidad y paz mundial. E metanan aki ta consisti di 5 pilar:  e ser humano, planeta, prosperidad, paz y colaboracion. Un di e principionan fundamental di e metanan ta pa no laga ningun hende “atras”. E 17 metanan ta:

1: Fin na pobreza                                             9: Industria, Innovacion y Infrastructura       

2: Cero hamber                                                10: Reduccion di desigualdad

3: Bon salud y bienestar                                  11: Ciudad y comunidadnan sostenibel

4: Educacion di calidad                                  12: Produccion y consumo responsabel

5: Igualdad di genero                                      13: Accion pa e clima

6: Acceso na awa limpi y sanitario                  14: Bida bou awa       

7: Energia limpi y pagabel                               15: Vida riba tera

8: Trabou decente y crecemento economico   16: Institucionnan solido pa paz y husticia

                                                                        17: Aliansa pa logra e metanan                       

Manera sr. António Guterres, secretario general di Nacionnan Uni, a bisa, mundo henter ta encontra nan mes den un momento critico pa loke ta trata e metanan di desaroyo sostenibel.

Mas di un aña despues di e pandemia mundial cu nos ta aden, miyones di hende a perde nan bida, e consecuencia pa e hende y pa nos economianan no tabatin precedente, y e esfuersonan pa logra recuperacion te awor tabata desigual, tin ora asta inhusto y no ta suficientemente orienta riba e metanan pa logra desaroyo sostenibel. E crisis mundial ocaciona pa e pandemia ta un menasa riba tur e avance y desaroyo logra te cu awor. E situacion actual sigur lo retrasa aun mas cu nos ta bay logra e metanan na 2030. 

Asina mes Parlamentario Shailiny Tromp-Lee a uni na e expresion di nos Prome Minister cu pa Aruba e SDGs ta keda un prioridad apesar di e retonan cu nos tin como pais chikito. Awor mas cu nunca nos mester keda determina pa Aruba hunto cu mundo henter, traha den bon colaboracion pa logra e metanan di SDG y brinda paz, prosperidad y un planeta sano pa un y tur. 

Door di duna atencion na e di 6 aniversario di e Metanan di Desaroyo Sostenibel, nos ta subraya nan importancia y ta enfatisa cu ta henter comunidad incluso nos gobierno, parlamento, sector comercial y nos NGOsnan hunto mester sigui enfoca riba desaroyo di solucionnan inovativo y sostenibel pa Aruba. 

Un area cu sigur a keda impacta grandemente door di e pandemia ta nos enseñansa. E enfoke mester ta dirigi pa percura cu tur mucha ta ‘haal in’ e retraso y ta keda debidamente prepara pa sigui cu nan estudio exitosamente.