E prome Debate Electoral tabata uno casi “sin debate”

ORANJESTAD (AAN): Diahuebs anochi, moderador Yolanda Richardson a hiba e tan spera prome edicion di Debate Eleccion 2021 di Camara di Comercio den un bon tempo, bon coordina, y hopi conciso.

   E anochi a cuminza cu e prome tanda y varios ‘oops’, ora cu e.o. luz no kier a cende, tambe e computer randomizer a tira lot pa sa cua tres lider lo contesta preguntanan, y despues ningun hende a corda pa mantene e resultado di e randomizer y a trece confusion eynan.

   Tambe na e sesion di pregunta con pa elimina corupcion, diripiente e moderador a hasta lubida di duna Ricardo Croes di Partido RED su chens di contesta.

   Preguntanan cu a trece contestanan demasiado yen di imaginacion, tabata e.o. e plan di algun pa bin cu cantidad di facultad na Aruba, y tambe pa keda yena e fondo di pensiun cu placa pa por baha e edad di pensiun riba e isla.

   FALTA DI “DEBATE”:

   Contrario na loke publico a mira den e debate di 2017, e biaha aki por a mira ningun “debate” bibo entre e lidernan politico.  Esaki tabata e prome comentarionan cu por a tende.  Hopi persona a pensa cu e ‘3 lider’ contestando pregunta no a contribui hopi na trece e ambiente di ‘debate’ cu pueblo ta costumbra cune di hopi decada caba.

   Enberdad algun politico a haya 30 seconde pa reacciona algun biaha, pero esaki ta djis yuda pa cool-down e debate aun mas, envez di ‘engage’ e politico mas.

   E prome pregunta tabata algo cu hopi hende na Aruba ta pensa di basta tempo riba dje, esta ki idea tin pa asina rebiba Caya Grandi bek.   Aki a bin nota cu e idea di rebiba Caya Grandi ta bon, pero corda cu Gobierno no ta doño di tur edificio den Caya Betico Croes na Playa.

   Despues di tur e erornan chikito aki, a sigui cu Tanda 2 cu preguntanan di e comision independiente.  A resulta cu keto bay e luz fuerte straight riba cabez di cada lider cu tabata trece un imagen no mucho placentero di e lidernan.

   E pregunta encuanto ideanan pa yuda comercio a wordo bon observa, y a mustra cu lidernan tambe ta pensa cu e redtape na Aruba pa habri un negoshi ta keto bay dificil.

   Riba e pregunta encuanto diversifica economia, e lider di Partido RED a menciona cu pa diversifica economia, e ta mustra atrobe riba produccion di hemp y cannabis na Aruba.  Esaki ta unda cu agricultura lo por garantiza cu ta crea un pilar economico nobo, un economia responsable cu por depende riba dje.

   Partido AVP a bisa cu lo no bay pone peso riba lomba di ciudadanonan pa cubri gasto di AZV, y e peso.  Pero sigur un consulta y dialogo mester wordo tuma prome cu tuma decision asina.

   A bira ora pa comunica, dialoga cu tur partner prome cu tuma decision.  Ta di lamenta cu e ciudadanonan di edad halto tin di paga e premie ey di AZV ora di bay cu pensiun.  Bo ta sinti e grito di adultonan mayor pa suavisa esaki.  E gasto aki lo bay pisa mas riba nos ciudadanonan di edad grandi.

   E speranza tey cu pa e siguiente debate di Diahuebs 17 di Juni 2021, lo bay tin chens pa e ‘debate’ ta mas bibo manera mester ta.