Parlamentario Evelyn Wever-Croes
ORANJESTAD (AAN): Durante tratamento di presupuesto supletorio siman pasa, Fraccion di MEP a presenta un mocion pa duna studiantenan “kwijtschelding”, dispensacion di nan Arubalening.
Pues si nan bin Aruba back pa traha, nan no mester paga e Arubalening back. Esaki lo a conta pa studiantenan cu bay studia den exterior y pa esnan cu ta studia na Aruba. Awor cu tin surplus, y a crea espacio financiero, fraccion di MEP ta considera esaki un estimulo pa trece nos hobennan back, of tene nan aki. Mirando cu falta hende pa traha na Aruba, awor ta e momento apropia.
Lamentablemente parlamentarionan di AVP y Futuro a vota CONTRA di e mocion aki sin duna hustificacion. Tur mocion di MEP nan a vota contra. Hopi inmadures politico.
Di parti di Fraccion di MEP a sostene e mocionnan di AVP y Futuro cu tabata bon. Esunnan cu tabata fout, of contra ley of tratado MEP no por a sostene. Esey ta madures politico.
“Pero nos no ta give-up. E lucha ta sigui! Ta yega un momento cu nan lo bay trata e “kwijtschelding” di e Arubalening pa nos studiantenan”, lider di Fraccion di MEP, Evelyn Wever-Croes a duna di conoce.
