Aruba no ta mara na Bestuurlijk Akkoord y toch Gobierno ta laga Hulanda dicidi riba futuro

Parlamentario Rocco Tjon:

ORANJESTAD (AAN): Durante un conferencia di prensa, parlamentario Rocco Tjon a enfatisa cu gobierno actual ta duna informacion incorecto riba e rijkswet. Segun oposicion, Gobierno ta sigui referi na e Bestuurlijk Akkoord y ta bisa cu Aruba ta “mara” na dje. Tjon a aclaria cu esaki no ta berdad.

  Segun Tjon den punto 9 di e acuerdo ta para cla cu Aruba tin escogencia y no ta mara: “Indien de rijkswet (...) niet conform planning tot stand worden gebracht wordt de rente weer verhoogd naar 6.9%.”

   Mike Eman mes a confirma na comienso di juli cu e negociacionnan politico apenas lo a cuminsa na augustus, y cu Aruba no ta mara na nada.

   Poder ta na Den Haag: Tjon a enfatisa cu Parlamento di Aruba no tin ningun poder di decision mas riba e rijkswet. Ta Parlamento di Hulanda lo ta e organo cu lo trata e ley, vota riba dje y por haci cambio por medio di amienda y mocion, mientras Aruba solamente por tende nan dicidi riba nos futuro y libertad. Cu otro palabra, e decision final riba e rijkswet ta worde tuma na Den Haag y no na Oranjestad.

   Pa finalisa Parlamentario Tjon ta haci e siguiente pregunta na e politiconan cu ainda ta defende e ley aki: “Si e rijkswet aki ta realmente asina bon pa Aruba, di con boso no ta admiti cu boso mes a bay di acuerdo pa esaki y cu e ta ‘boso logro’? Y kico ta e beneficio real pa nos pais?”