Golpi duro na narcotraficantenan!
ORANJESTAD (AAN): A dura te Diamars atardi pa Ministerio Publico divulga di un accion grandi cu a socede den fin di siman aki riba lama rond di Aruba. Mientras pueblo tabata gozando di Parada di Carnaval cu Lighting Parade na Playa, e mesun anochi ey pa marduga di Diadomingo, tur cos a cuminza ora cu a ‘detecta’ un movimento riba Marine Radar.
Su movimento tabata uno clasico, y mesora Wardacosta a sigui su movimento, y a cuminza pone su unidadnan den Lama Caribe na altura.
Asina a manda Botonan di Reaccion Rapido manera Metal Shark pa bay den direccion di e boto raro aki. Ora cu nan a yega cerca, a bin haya un boto tipo Go-Fast moviendo cu luz paga. Pa colmo ora tripulantenan a ripara cu autoridad ta den cercania nan a purba huy. Pero a logra stop nan y tur tripulante e ora tabata man den halto pa entrega nan mes.
Di e forma aki Wardacosta a logra intercepta un cargamento significativo di droga durante e operacion maritimo. Segun e informacion oficial di Ministerio Publico, ta trata di un cantidad grandi di cocaina y marihuana cu tabata wordo transporta riba un boto. E cantidad di peso (kilahe) atrobe ta wordo laga afo door di Ministerio Publico, y ta djis referi na palabra di “grote hoeveelheid cocaine en marihuana”.
Si nan a divulga cu durante e operacion, autoridadnan a logra detene varios tripulante, cu awor ta encarcela y tin di duna cuentanan di nan acto.
E investigacion ta andando para revela mas detaye tocante e caso. Autoridadnan ta sigui alerta pa combati e trafico ilegal di droga den region. Potret aki ta uno di archivo.
