Wardacosta a controla boto local y haya droga abordo

Total di 237 kilo di droga

• Nan a purba drenta e isla sin ‘klaar-in’ ni nada 

ORANJESTAD (AAN): Diabierna durante oranan di merdia, oficialnan di Wardacosta a actua riba un speedboat cu 2 Outboard Engine cu a caba di yega for di Colombia, y no a bay klaar-in oficialmente cerca Inmigracion ni Douane.

   E boto aki a djis drenta Paardenbaai y a bay na e beach cu tin net na salida di Lagoen na Playa, pues pazuid di Residencia di Gobernador.

   Sinembargo ora cu Wardacosta a yega eynan, a bin realiza cu e hendenan cu ta atende e boto aki, a core haci un trabao extremadamente rapido pa his’e riba trailer, y ta casi cla pa bandona e area cune.  Pero tabatin un dificultad cu wiel, y esey a stroba nan intento di bandona e zona mesora.

   Wardacosta a yega cu diferente funcionario riba e boto aki cu e nomber “Thailia”.  Un persona local y un otro di habla hispano so tabatey e momento ey.   Pero tin indicacion cu tabatin mas hende abordo, pero nan a logra baha na awa den un auto un rato prome.

   Oficialnan di Wardacosta a informa e dos persona aki cu nan ta confisca e boto aki, y ta bay cune mesora pa Punto di Sosten di Wardacosta di Caribe Hulandes, cu ta riba tereno di Marinierskazerne na Savaneta.

   Droga haya abordo: Cu yudansa di Polis, como tambe K-9 Unit di Cuerpo Policial, a bay haci un control riguroso riba e boto aki.  Den algun compartimento di e boto, na un forma bon scondi a bin haya varios paki di droga scondi.

   Wardacosta a confirma, cu en total a haya 237 kilo di droga scondi riba e boto ‘Thailia’, cu matricula A-2640.  Automaticamente a detene e homber local, y e otro persona kende a resulta di ta Venezolano.

   Di e 237 kilo di droga aki, tabatin 180 kilo cu ta di cocaina.  E otro 57 kilo ta di marihuana.  A haya sa cu e speedboat Thailia aki mes algun dia pasa a sali bay rumbo pa Colombia, unda a “yen’e cu droga” na lugarnan scondi.  Nan a kere cu nan tabatin un plan perfecto pa yega beach, subi cu e droga y bay cas cune.  Pero hecho cu no a klaar-in, y actua asina sospechoso a hala atencion di autoridad.  Chens ta grandi cu autoridad lo a haya tip tambe di nan yegada.

   E droga y e dos hombernan a wordo entrega na Cuerpo Policial, cu awor ta sigui cu e investigacion.